ბელგიის ნაკრებთან მაიკლ ოლისეს მიერ მატჩის მიწურულს გატანილი გოლი ზინედინ ზიდანისთვის აშკარად ემოციური მომენტი იყო.
ბრიუსელში გამართული შეხვედრა ძალიან დაძაბული და თანაბარი გამოდგა. UEFA-ს ერთა ლიგის მატჩის ბოლო წუთებამდე ანგარიში 0:0 იყო, მიუხედავად იმისა, რომ „ლურჯები“ გოლთან რამდენჯერმე ძალიან ახლოს იყვნენ, მათ შორის, ბურთი როგორც ძელს, ისე ხარიხას მოარტყეს.
ზიდანი საფრანგეთის ნაკრების მთავარი მწვრთნელის პოსტზე წარმატებული სტარტის გაგრძელებას ცდილობდა. პარასკევს მისმა გუნდმა თურქეთი 1:0 დაამარცხა, მეორე ტაიმში ერთადერთი გოლი კილიან მბაპემ გაიტანა.
ბელგიასთან კი საფრანგეთს მაიკლ ოლისეს ინდივიდუალური ოსტატობა დასჭირდა. მან ბურთი მხრით გააკონტროლა, მეტოქის საჯარიმოს კიდემდე წინააღმდეგობის გარეშე მიიწია და შემდეგ ულამაზესი დარტყმით სენე ლამენსის კარის შორეულ კუთხეში მოათავსა.
ზიდანმა გამარჯვების გოლი განსაკუთრებულად ემოციურად აღნიშნა, გვერდით ხაზთან გაიქცა და კონუსზე მოთავსებულ ბურთს მთელი ძალით დაარტყა.
მატჩის შემდეგ რეალის ყოფილ მწვრთნელს ამ ემოციური რეაქციის შესახებ ჰკითხეს:
„არც კი ვიცი, რა გავაკეთე (იცინის). მის გარღვევას იმ მომენტიდან ვაკვირდებოდი, როდესაც დრიბლინგი დაიწყო. წარმოუდგენელი ეპიზოდი იყო, შემდეგ კი ბურთი დავინახე.
Voilà! შესაძლოა, ცოტა სასაცილოც გამოვიდა, მაგრამ ასე მოხდა“, - განაცხადა ზიდანმა.
VIDEO: ოლისეს ეფექტი - როგორ აღნიშნა ზიდანმა გამარჯვების გოლი?
