სლოტი: "ვირცი თვითონვე ხვდება, რომ ერთი გოლი არაა საკმარისი"

ლივერპულის მთავარი მწვრთნელი არნე სლოტი ფლორიან ვირცის მიერ პრემიერ ლიგაში პირველი გოლის გატანას გამოეხმაურა.

გერმანელმა შემტევმა ვულვერჰემპტონის კარი აიღო (2:1).

„სრულიად დარწმუნებული ვარ, რომ ვირცმა შვება იგრძნო. დავინახე მისი რეაქცია გოლზე — თანაგუნდელებსაც ძალიან გაუხარდათ მის გამო.

ფეხბურთში ძირითადად შედეგებით გვაფასებენ, ცალკეულ ფეხბურთელებს კი — გოლებითა და საგოლე გადაცემებით. შესაძლოა, ეს სამართლიანიც იყოს. მაგრამ ზოგჯერ გვავიწყდება, კიდევ რამდენი რამ უნდა გააკეთოს ფეხბურთელმა მატჩის განმავლობაში.

ვირცმა ლივერპულში უკვე რამდენიმე კარგი თამაში ჩაატარა. ის ყოველ შეხვედრაში უმჯობესდება. ნელ-ნელა ფორმაში შედიოდა, პირველ გოლს უახლოვდებოდა, ამიტომ მისი გოლი გასაკვირი არ არის. მაგრამ პირველ რიგში ის თავადვე ხვდება, რომ ერთი გოლი საკმარისი არ არის“, — განაცხადა სლოტმა.