პორტუგალიის საფეხბურთო სეზონი ოფიციალურად სუპერთასის მატჩით გაიხსნა.
აღნიშნულ შეხვედრაში ტიტულისთვის ერთმანეთს სპორტინგი და ბენფიკა დაუპირისპირდნენ და გამარჯვება არწივებს დარჩა - 1:0.
მატჩის ერთადერთი გოლი 50-ე წუთზე პავლიდისმა გაიტანა და ბენფიკასთვის სეზონი ტიტულით გაიხსნა.
სპორტინგის რიგებში შედგა გიორგი ქოჩორაშვილის ოფიციალური დებიუტიც, რომელიც სასტარტოში არ ყოფილა, თუმცა მოედანზე 69-ე წუთზე გამოჩნდა და 21 წუთი ითამაშა.
ამ პერიოდში ქოჩორა ბურთს 21-ჯერ შეეხო, 16-დან 13 ზუსტი პასი მიითვალა, კარისკენ დარტყმის მცდელობა კი არ ჰქონია.
საინტერესოა, რომ 24/25 სეზონიც სწორედ ამ გუნდების მატჩით დაიხურა - 25 მაისს ისინი ერთმანეთს თასის ფინალში დაუპირისპირდნენ და იქ გამარჯვება სპორტინგმა მოიპოვა - 3:1.
პორტუგალიის ჩემპიონატი კი ერთ კვირაში, 8 აგვისტოს, სპორტინგისთვის, კასა პიასთან გასვლითი მატჩით იწყება.
