ტიერი ანრიმ იამალისა და კვარაცხელიას მოქმედებები შეადარა

ტიერი ანრიმ ჩემპიონთა ლიგის ნახევარფინალში ლამინ იამალისა და ხვიჩა კვარაცხელიას მოქმედებები განიხილა.

ფრანგმა ლეგენდამ იამალის შეცდომისკენ მიუთითა, რომელიც ბარსელონას ძვირად დაუჯდა, სწორ მაგალითად კი ანრიმ კვარაცხელია მოიყვანა.

"ბოლო წუთებზე ლამინ იამალს შეეძლო ბურთი კუთხურის ალმისკენ წაეღო, მაგრამ მან შიგნით შემოწევა და კიდევ ერთი გოლის გატანა სცადა. თუ გაიტანდა, მეტოქე ვერაფერს გააკეთებდა და ყველაფერი დამთავრდებოდა. მაგრამ გოლი არ გავიდა და ის დაცვაში არ ჩამოვიდა.

ახლა შევადაროთ ეს მომენტი პარი სენ-ჟერმენისას. 91-ე წუთზე, როცა 2 გოლით წინ იყვნენ, შეხედეთ კვარაცხელიას და მის გამოცდილებას. ის არ ცდილობს მოთამაშეებს შორის გაძრომას და აუტის ხაზს მიჰყვება. ეს არის ის, რაც უნდა გააკეთო თამაშში და როგორც უნდა გახვიდე ჩემპიონთა ლიგის ფინალში." - განაცხადა ანრიმ CBS Sports-ის ეთერში.

შეგახსენებთ, რომ ჩემპიონთა ლიგის ფინალში ერთმანეთს პსჟ და ინტერი დაუპირისპირდებიან. მატჩი 31 მაისს, მიუნხენში გაიმართება.