საფეხბურთო ტრანსფერები დიდი ხანია გასცდა უბრალო მოთამაშეების ცვლას და დამოუკიდებელ, მრავალმილიონიან ბიზნესად იქცა.
ზოგჯერ ეს გარიგებები ამართლებს და კლუბის ისტორიას ცვლის, ზოგჯერ კი მხოლოდ ფინანსურ კრახად რჩება. მიუხედავად შედეგისა, ციფრები, რომლებიც თანამედროვე ფეხბურთში ფიგურირებს, ნამდვილად შთამბეჭდავია.
წარმოგიდგენთ ყველა დროის 10 ყველაზე ძვირადღირებულ გარიგებას:
10. ედენ აზარი (ჩელსი -> რეალ მადრიდი) - €120.8 მლნ
ტრანსფერი, რომელიც სანტიაგო ბერნაბეუზე დიდი იმედებით დაიწყო, თუმცა ფეხბურთის ისტორიაში ერთ-ერთ ყველაზე წარუმატებელ გარიგებად დარჩა. მუდმივმა ტრავმებმა ბელგიელ ვარსკვლავს საშუალება არ მისცა, რეალში თავისი ნამდვილი პოტენციალი გამოევლინა.
9. ენცო ფერნანდესი (ბენფიკა -> ჩელსი) - €121 მლნ
მსოფლიო ჩემპიონატზე ტრიუმფის შემდეგ, არგენტინელი ნახევარმცველი ჩელსის ახალი ეპოქის მთავარ სიმბოლოდ იქცა. ლონდონელებმა მასში გუნდის მომავალი ცენტრი დაინახეს და რეკორდული თანხაც გადაიხადეს.
8. ფლორიან ვირცი (ლევერკუზენი -> ლივერპული) - €125 მლნ
25/26 წლების სეზონის ერთ-ერთი ყველაზე ხმაურიანი ტრანსფერი. ლივერპულმა გერმანელი ტალანტის შესაძენად კლუბის ისტორიაში უპრეცედენტო თანხა გაიღო, რითაც შუა ხაზი მნიშვნელოვნად გააძლიერა.
7. ჯუდ ბელინგემი (დორტმუნდი -> რეალ მადრიდი) - €127 მლნ
ეს ის შემთხვევაა, როდესაც ყოველი გადახდილი თეთრი გამართლებულია. ბელინგემი მადრიდში მისვლისთანავე გუნდის ლიდერად იქცა და დაამტკიცა, რომ თანამედროვე ფეხბურთის ერთ-ერთი მთავარი ფიგურაა.
6. ჟოაო ფელიქსი (ბენფიკა -> ატლეტიკო) - €127.2 მლნ
ატლეტიკომ ამ ტრანსფერით ყველაზე ძვირადღირებული ფსონი დადო თავის ისტორიაში. მიუხედავად დიდი მოლოდინისა, პორტუგალიელი შემტევის სტილი ყოველთვის არ ერგებოდა სიმეონეს მკაცრ ტაქტიკურ მონახაზს და, საბოლოოდ, არ გაამართლა.
5. ფილიპე კოუტინიო (ლივერპული -> ბარსელონა) - €135 მლნ
ბრაზილიელი ჯადოქრის გადასვლა კატალონიაში ბარსელონასთვის მწარე გამოცდილებად იქცა. მიუხედავად დიდი ფასისა, კოუტინიომ ვერ შეძლო იმ გავლენის მოხდენა გუნდზე, რასაც მისგან ფანები ელოდნენ.
4. ალექსანდრ ისაკი (ნიუკასლი -> ლივერპული) — €145 მლნ
2025/26 წლების სეზონის მთავარი "ბომბი". ლივერპულმა შვედი ფორვარდის სანაცვლოდ პრემიერ ლიგისთვის რეკორდული თანხა გადაიხადა, რითაც ხაზი გაუსვა თავის ამბიციებს როგორც შიდა, ისე ევროპულ ასპარეზზე.
3. უსმან დემბელე (დორტმუნდი -> ბარსელონა) - €148 მლნ
ნეიმარის წასვლის შემდეგ ბარსელონამ ფორსმაჟორულ სიტუაციაში გადაწყვიტა დემბელეს შეძენა. ფრანგი შემტევის კარიერა კამპ ნოუზე ტრავმებისა და არასტაბილურობის ნაზავი გამოდგა. თუმცა, ახლა ფრანგის ასპარეზობა პსჟ-ში შთამბეჭდავია.
2. კილიან მბაპე (მონაკო -> პსჟ) - €180 მლნ
პარიზელებმა ამ ტრანსფერით აჩვენეს, რომ მათთვის ფინანსური ბარიერები არ არსებობს. მბაპე გახდა ყველაზე ძვირადღირებული ახალგაზრდა ფეხბურთელი და წლების განმავლობაში პსჟ-ს წარმატების მთავარი გარანტი იყო, რასაც ვერ ვიტყვით მადრიდის რეალში მოთამაშე ფრანგზე. ასევე უნდა აღინიშნოს, რომ მბაპეს წასვლის შემდეგ პსჟ-მ ჩემპიონთა ლიგა მოიგო, რასაც იქამდე ვერ ახერხებდა.
1. ნეიმარი (ბარსელონა -> პსჟ) - €222 მლნ
და აი ისიც - ტრანსფერი, რომელმაც სამუდამოდ შეცვალა საფეხბურთო ბაზარი. 2017 წელს გადახდილი ეს ასტრონომიული თანხა დღემდე რჩება აბსოლუტურ რეკორდად, რომლის მოხსნაც ჯერჯერობით ვერავინ შეძლო.
