ინგლისის ნაკრების მთავარმა მწვრთნელმა, თომას ტუხელმა, განაცხადა, რომ პანამასთან გამარჯვებისა და ჯგუფში პირველი ადგილის დაკავების შემდეგ, ინგლისისთვის მსოფლიო ჩემპიონატი ფაქტობრივად თავიდან იწყება.
პანამასთან 2:0 დასრულებული მატჩის შეფასებისას ტუხელმა აღნიშნა, რომ ეს იყო რთული, ფიზიკური დაპირისპირება, სადაც მისმა გუნდმა საჭირო შედეგის მიღწევა შეძლო.
მწვრთნელმა განსაკუთრებული ყურადღება გაამახვილა ჯუდ ბელინგემის თამაშზე, რომელმაც ამ მატჩში გოლი გაიტანა, საგოლე გადაცემა მიითვალა და შეხვედრის საუკეთესო მოთამაშედაც დასახელდა.
ტუხელის თქმით, გუნდი კმაყოფილია ბელინგემის ამჟამინდელი ფორმით და აღნიშნა, რომ პლეი-ოფის ეტაპზე ინგლისი კიდევ უფრო მეტ მობილიზებას გამოაჩენს. გერმანელი სპეციალისტი დარწმუნებულია, რომ რაც უფრო მაღალი იქნება შეხვედრების მნიშვნელობა, მით უფრო უკეთეს ფეხბურთს აჩვენებს მისი გუნდი.
