უარი მილიონებსა და სტეფ კარის: რატომ ფილადელფია?

მეფის საბოლოო გადაწყვეტილება მიღებულია. 41 წლის ლებრონ ჯეიმსი კარიერის ბოლო, მეხუთე საჩემპიონო ბეჭდის მოსაგებად ფილადელფია სიქსერსში გადადის.

ლეიკერსის დატოვების შემდეგ, NBA-ს ყველა დროის ერთ-ერთი საუკეთესო კალათბურთელმა გოლდენ სტეიტის, მაიამისა და კლივლენდის შეთავაზებები დაბლოკა და აღმოსავლეთ კონფერენციაში სუპერგუნდის შექმნა გადაწყვიტა.

ფილადელფია ამ ზაფხულს ნამდვილი მონსტრი გახდა. პოლ ჯორჯის სანაცვლოდ ჯეილენ ბრაუნის დამატების შემდეგ, ლებრონის მისვლა სიქსერსს ლიგის ყველაზე საშიშ შემტევ ძალად აქცევს. ჯეიმსი, ბრაუნი, ჯოელ ემბიიდი და ტაირის მაქსი - ეს კვარტეტი, ახალბედა ვარსკვლავ VJ ეჯკომბთან ერთად, ფილადელფიას 1983 წლის შემდეგ პირველი ჩემპიონობის უმთავრეს ფავორიტად აქცევს.

ყველაზე შოკისმომგვრელი ამ ტრანსფერში ფინანსური დეტალებია. ლებრონი სიქსერსში, ფაქტობრივად, კაპიკებში ითამაშებს. იმის გამო, რომ ფილადელფიას სახელფასო ჭერი სრულად შევსებული აქვს, ჯეიმსი ვეტერანის მინიმუმს, 2-წლიან და 8-მილიონიან კონტრაქტს დასჯერდა. ამას გარდა, ამერიკული მედიის ცნობით, ლებრონი საცხოვრებლად ნიუ-იორკში დარჩება და ფილადელფიაში ვარჯიშებსა და თამაშებზე ივლის.

ამ ტრანსფერმა სერიოზულად დააზარალა კონკურენტები. გოლდენ სტეიტს სტეფ კარის ფაქტორმა და ლებრონის კალიფორნიაში დარჩენის პერსპექტივამაც ვერ უშველა - ჯეიმსმა კარგად დაინახა, რომ ტრავმირებული ჯიმი ბატლერისა და დასუსტებული უორიორსის იმედად დასავლეთ კონფერენციაში შანსი არ ექნებოდა. ხელმოცარული დარჩა მაიამიც, რომელსაც იანის ანტეტოკუნმპოს გვერდით მთავარი გამთამაშებლის მოყვანა სურდა.

ახლა მთელი ყურადღება ფილადელფიისკენაა მიმართული - გაამართლებს თუ არა ეს ისტორიული რისკი?