VIDEO: ასხლეტით ჩაგდებული გადამწყვეტი 3-ქულიანი ოვერტაიმში - ტორონტომ სერია მე-7 მატჩში გადაიყვანა

სანდრო მამუკელაშვილის ტორონტო რეპტორსმა კლივლენდ კავალიერსთან სერიაში ანგარიში კიდევ ერთხელ გაათანაბრა და შემდეგ ეტაპზე გამსვლელი მე-7 მატჩით გადაწყდება. კანადელებმა, ოვერტაიმით, 112:110 გაიმარჯვეს.

ოვერტაიმის ბოლო წამები სუპერ დრამატული გამოდგა - სირენამდე 11 წამით ადრე ბურთს კლივლენდელები ფლობდნენ, თუმცა დაკარგეს და 1.2 წამით ადრე არ ჯეი ბერეტმა სამქულიანი რთულად ჩააგდო, რის შემდეგაც სამქულიანი კლივლენდელებმაც ისროლეს და ცოტა დააკლდათ.

ბერეტის გამარჯვების სამქულიანის ასხლეტით ჩაგდებამ შეიძლება, კავაი ლეონარდის 2019 წლის ლეგენდარული 4-ასხლეტიანი ბაზერ ბითერი გაგვახსენა, აღმოსავლეთ კონფერენციის 1/2 ფინალის მე-7 მატჩში.

გამარჯვებულთა შორის, სოლიდური ორმაგი დუბლი სკოტი ბერნსმა შეასრულა - 25 ქულა, 7 მოხსნა, 14 ასისტი (გარდა ამისა, 3-3 ჩაჭრა და დაფარება), არ ჯეი ბერეტმა 24 ქულა, 9 მოხსნა, 3 ასისტი ჩაიწერა აქტივში, ხოლო ჯეი'კობ უოლტერსა (24 ქულა, 5 მოხსნა) და კოლინ მარეი-ბოილსს (17 ქულა, 7 მოხსნა, 2 ასისტი) ასევე მნიშვნელოვანი წვლილი ჰქონდათ.

სკოტი ბერნსი, 1997 წლის შემდეგ მხოლოდ მე-8 კალათბურთელია, ვინც პლეი-ოფის მატჩის ერთ ტაიმში მინიმუმ 14 ქულა და 10 ასისტი დააგროვა.

კლივლენდის მხარეს, ევან მობლიმ ასევე ორმაგი დუბლი მიითვალა - 26 ქულა, 14 მოხსნა, 3 ასისტი, თავიანთი როლი ჰქონდათ დონოვან მიტჩელს (24 ქულა, 5 მოხსნა, 2 ასისტი), ჯეიმს ჰარდენსა (16 ქულა, 9 მოხსნა, 9 ასისტი) და ჯარეტ ალენს (14 ქულა, 7 მოხსნა, 1 ასისტი).

რაც შეეხება მამუკელაშვილს, 14:24 წუთი ითამაშა და საკუთარ გუნდს 2 ქულა, 4 მოხსნა, 1 ასისტი შესძინა. გარდა ამისა, 1-1 ჩაჭრა და დაფარებაც მიითვალა.

სერიაში ანგარიში 3:3 გახდა და აქამდე ყველა შეხვედრა მასპინძლის გამარჯვებით დასრულდა. აღსანიშნავია ისიც, რომ უშუალოდ პლეი-ოფის ეგიდით, ტორონტოს კლივლენდში ზედიზედ 10 მატჩი აქვს წაგებული (მათ შორის 3 ამ სერიისას).

მოედნის უპირატესობა კლივლენდს აქვს, რაც ნიშნავს, რომ გუნდები გადამწყვეტ, მე-7 თამაშს მის როკეტ არენაზე ითამაშებენ - 4 მაისის 03:30 საათზე.