VIDEO: დილა-ბათუმი - საინტერესო ანგარიში და სატურნირო ცხრილის მდგომარეობა

ეროვნული ლიგის 26-ე ტური გორში გამართული სანახაობრივი და უხვგოლიანი შეხვედრით დაიწყო. დილამ საკუთარ მოედანზე ბათუმის დინამოს უმასპინძლა და მატჩი ფრედ, 2:2 დასრულდა.

შეხვედრა გორელთა აქტიურობით დაიწყა და 39-ე წუთზე ლაშა მენთეშაშვილის გოლით დაწინაურდნენ კიდეც, თუმცა პირველი ტაიმის მიწურულს, კომპენსირებულ დროში ლუკა წულუკიძემ წონასწორობა აღადგინა.

მეორე ნახევარში ბათუმელები ულად-ომარ იმრანმა გაიყვანა წინ. აღსანიშნავია, რომ ორივე შემთხვევაში სტუმართა გოლებს წინ სანდრო ალთუნაშვილის ზუსტი გადაცემები უძღოდა.

დილამ თამაშის გადარჩენა შეძლო. 82-ე წუთზე, შოთა შეყილაძის ჩაწოდების შემდეგ, ბათუმელთა ლუქსემბურგელმა მცველმა, ენეს მაჰმუტოვიჩმა ბურთი საკუთარ კარში ჩაჭრა.

შეხვედრის ბოლოს ბათუმელები არასრული შემადგენლობით დარჩნენ, რადგან 90+2-ე წუთზე უხეშობისთვის უერდი მარა გააძევეს.

ფრედ დასრულებული მატჩის შემდეგ, ბათუმის დინამო 44 ქულით სატურნირო ცხრილის ლიდერობას განაგრძობს. მას უკან რუსთავი (43 ქულა) და იბერია (40 ქულა) მიჰყვებიან.