VIDEO: დორგუს სადებიუტო გოლი - იუნაიტედმა ბრუნოს გარეშე 2022 წლის მარტის შემდეგ პირველად მოიგო

მანჩესტერ იუნაიტედმა ოლდ ტრაფორდზე 3-მატჩიანი მოუგებელი სერია დაასრულა და პრემიერ ლიგის მე-18 ტურში ნიუკასლს მოუგო.

თამაშში, რომელშიც საკმაოდ ბევრი საგოლე მომენტი შეიქმნა, ერთადერთი გოლი პატრიკ დორგუმ შეაგდო. 21 წლის დანიელმა იუნაიტედის მაისურით სადებიუტო გოლი გაიტანა (38-ე მატჩში).

პატრიკ დორგუს პრემიერ ლიგის 29 შეხვედრაში 3 საგოლე მოქმედება აქვს და მათგან 2 ბოლო ორ მატჩში - წინა ტურში, ასტონ ვილასთან, საგოლე პასი გააკეთა.

საინტერესოა, რომ 2022 წლის მარტის შემდეგ იუნაიტედმა მოიგო პირველი ისეთი შეხვედრა, რომელშიც კაპიტან ბრუნო ფერნანდეშს მონაწილეობა არ მიუღია - 1 ფრე და 5 წაგება.

მეორე მხრივ, ხაზგასასმელია, რომ ნიუკასლს პრემიერ ლიგაში სტუმრად ბოლო დროს საშინელი შედეგები აქვს - 12-დან 1 თამაში მოიგო (4 ფრე და 7 წაგება) და 6-ჯერ გოლიც ვერ გაიტანა.

ამ გამარჯვებით, რუბენ ამორიმის გუნდმა 29 ქულა მოაგროვა, რაც იმდენია, რამდენიც მე-4 ადგილოსან ჩელსის აქვს (ლივერპულიც ამდენივე ქულითაა). ოღონდ, ამავე ტურში წითელი ეშმაკების გადასწრება, ჩელსისა და ლივერის გარდა, სანდერლენდსაც (27 ქულა) შეუძლია.

მანჩესტერელები პრემიერ ლიგის მომდევნო თამაშს, 30 დეკემბერს, ისევ ოლდ ტრაფორდზე, ჩემპიონატის ბოლო დეკადების ერთ-ერთ უსუსტედ გუნდ ვულვზთან გამართავენ.