VIDEO: ძოწენიძის ასისტი - სეზონში მე-3 საგოლე მოქმედება შეასრულა

თორნიკე ძოწენიძემ სლოვაკეთის NIKE LIGA-ს მიმდინარე სეზონში კიდევ ერთი საგოლე მოქმედება შეასრულა.

საჩემპიონო ჯგუფის მე-8 ტურში, ძოწენიძის მიხალოვცე სანდრო ნარიმანიძის ჟილინას ხვდებოდა - მე-4 წუთზე, თორნიკემ მეტოქეს დაასწრო, კარგი ჩაჭრა შეასრულა და ბურთი ისეთ ზონაში გადააგდო, საიდანაც თანაგუნდელმა კარიდან გამოსულ მეკარეს გაუტანა და ანგარიში გახსნა. საბოლოოდ, ჟილინამ თამაში 3:2 მოიგო.

26 წლის ძოწენიძეს NIKE LIGA-ს წლევანდელ გათამაშებაში 22 შეხვედრა აქვს ჩატარებული და მე-3 საგოლე მოქმედება მიითვალა - 1 გოლი, 2 ასისტი.

30 მატჩის შემდეგ, მიხალოვცეს 38 ქულა აქვს, საჩემპიონო ჯგუფის ბოლო, მე-6 ადგილზეა, თუმცა კონფერენს ლიგაზე გასასვლელ პლეი-ოფში მონაწილეობას მაინც მიიღებს და ევროსაგზურის მოპოვების შანსი ექნება.

მომდევნო ტურში, 9 მაისს, მიხალოვცე უმასპინძლებს მე-2 ადგილოსან დუნაისკა სტრედას, რომლის რიგებშიც ცოტნე კაპანაძე და გიორგი გაგუა თამაშობენ.