VIDEO: ლევანდოვსკის 87-ე გოლი ნაკრებში - პოლონეთმა პლეი-ოფი პრაქტიკულად გაინაღდა

2026 წლის მსოფლიო ჩემპიონატის შესარჩევი ციკლის მე-6 მატჩში, პოლონეთის ნაკრებმა სტუმრად ლიეტუვას 2:0 მოუგო. გოლები სებასტიან შიმანსკიმ და რობერტ ლევანდოვსკიმ შეაგდეს. შიმანსკიმ ასისტიც გააკეთა.

ლეგენდარული თავდამსხმელისთვის 162-ე სანაკრებო შეხვედრაში 87-ე გოლია და თავისი ქვეყნის ნაკრების ყველა დროის ბომბარდირის პოზიციები კიდევ უფრო გაიმყარა. გარდა ამისა, რობერტს 36 საგოლე პასი აქვს, რაც ასევე პოლონელთა ყველა დროის რეკორდია.

6 მატჩის შემდეგ, პოლონეთმა 13 ქულა მოაგროვა და ლიდერ ნიდერლანდებს, რომელსაც მომდევნო ტურში უმასპინძლებს, 3 ქულით ჩამორჩება. მეორე მხრივ, ასევე 3 ქულით უსწრებს ფინეთს, რომელსაც სათამაშო მხოლოდ 1 ტური დარჩა - პოლონეთს კიდევ 2 თამაში აქვს.

პოლონეთს მინიმუმ პლეი-ოფში თამაში პრაქტიკულად განაღდებული აქვს და რატომ: ფინეთი მას ქულებით ვეღარ გადაასწრებს, ბურთების შეფარდებაში კი უდიდესი სხვაობაა - პოლონეთს +6 აქვს, ხოლო ფინეთს -5. ესეც რომ არა, პოლონეთი ბოლო ტურში მალტის ნაკრებთან თამაშობს.