VIDEO: ლიდერებმა ისევ მოიგეს - იბერია პირველ ადგილზე რჩება

ეროვნული ლიგის 32-ე ტურში, ორივე ლიდერმა მოიგო და პირველობა კვლავ იბერია 1999-მა შეინარჩუნა. იბერიელებმა წყალტუბოს სამგურალს 2:0 მოუგეს, მათმა კონკურენტმა დილამ კი ამავე ანგარიშით თელავში იმარჯვა.

გუგა ნერგაძის გუნდმა სამგურალთან მატჩის ბედი მეორე ტაიმში გადაწყვიტა - 53-ე წუთზე, ამირან ძაგანიამ შეაგდო (სეზონში მე-4 გოლია) და თავი ზედიზედ მეორე ტურში გამოიჩინა, მსაჯის მიერ დამატებულ წუთებზე კი არმელ ზუჰურიმ ქართულ კარიერაში პირველად გაიტანა.

აღსანიშნავია, რომ ძაგანიას საგოლე გადაცემა გაუკეთა ლუკა სილაგაძემ, რომლისთვისაც მიმდინარე სეზონში მე-6 ასისტია და ამ სიაში მე-2 ადგილზე გადაინაცვლა - მასზე წინ მისივე თანაგუნდელი და იბერიას კაპიტანი, გიზი მამაგეიშვილია (8 საგოლე პასი).

რაც შეეხება დილას, გორელებმა თელავს არუნა უატარასა და ბლანკსონ ანოფის გოლებით აჯობეს. უატარას სეზონში 4 გოლი და 2 ასისტი მოუგროვდა, ანოფისთვის კი მე-2 გოლია.

შედეგად, ჩემპიონატის დამთავრებამდე 4 ტურით ადრე, იბერიასა და დილას 68-68 ქულა აქვთ - ლიდერად იბერია, ურთიერთშეხვედრებში უპირატესობის გამო, რჩება.

ბოლო 4 ტურში გუნდების კალენდარი ასეთია:

კოლხეთი V იბერია; დინამო ბათუმი V დილა

იბერია V დინამო თბილისი; დილა V სამგურალი

გარეჯი V იბერია; კოლხეთი V დილა

იბერია V გაგრა; დილა V დინამო თბილისი.