ჩემპიონთა ლიგის 1/16 ფინალის საპასუხო მატჩში ნორვეგიულმა ბოდო გლიმტმა ინტერს სტუმრადაც მოუგო და მერვედფინალში გავიდა.
პირველი მატჩის შინ 3:1 მოგების შემდეგ, ბოდო გლიმტი მილანში მოპოვებული უპირატესობის დასაცავად ჩამოვიდა და პირველ ტაიმში თავის ამოცანად თავი იდეალურად გაართვა — კრისტიან კივუს გუნდს მომენტის შექმნა უჭირდა, ნორვეგიელები კი შეტევაზე იშვიათად ფიქრობდნენ.
თამაშის მიმდინარეობა დიდად არც მეორე ტაიმში შეცვლილა, სანამ მანუელ აკანჯიმ საკუთარ საჯარიმოსთან შეცდომა არ დაუშვა, რამაც ბოდო გლიმტს ჯუზეპე მეაცაზე დაწინაურების საშუალება მისცა — ბოდო გლიმტი 58-ე წუთზე დაწინაურდა.
72-ზე სტუმრებმა იდეალური შეტევა დახაზეს და მეორე გოლიც გაიტანეს, რამაც ინტერის ამოცანა პრაქტიკულად შეუსრულებელი გახადა — არასრულ 20 წუთში გუნდს 4 გოლი უნდა გაეტანა მხოლოდ იმისთვის, რომ საქმე დამატებით დროში გადაეყვანა.
ერთადერთი, რაც მილანელებმა შეძლეს, ბასტონის გოლია — როცა საჯარიმოში არეულობის შემდეგ იტალიელი მცველის დარტყმული მეკარემ ხელში დააფიქსირა, თუმცა როგორც მსაჯის საათმა აჩვენა, ბურთმა ხაზი ჰაერში გადაკვეთა.
დარჩენილ დროში ინტერმა ვეღარაფერი გააწყო და ბოდო გლიმტმა ორი მატჩის ჯამში 5:2 იმარჯვა, რის ხარჯზეც 1/8 ფინალში დამაჯერებლად გავიდა, ნერაძურისთვის კი ევროტურნირების სეზონი წელს ნაადრევად დასრულდა.
ცალკე აღნიშვნის ღირსია ის ფაქტიც, რომ ბოდო გლიმტმა მიჯრით თავისი მე-4 დიდი მატჩი მოიგო — ლიგის ფაზის ბოლო ორ ტურში გუნდმა ჯერ სიტის მოუგო, შემდეგ ატლეტიკოს, მერე კი ინტერთან ორივე მატჩში შეძლო წარმატების მიღწევა და ეს ყველაფერი ისე, რომ შიდა ასპარეზზე სეზონი დასრულებულია — თავისი ბოლო მატჩი ლიგის მიღმა გუნდს ნოემბრის დასაწყისში აქვს ჩატარებული და მას შემდეგ, მხოლოდ ჩემპიონთა ლიგაზე ასპარეზობს.
