ინგლისის პრემიერ ლიგის 36-ე ტურში ლივერპულმა ენფილდზე ჩელსი მიიღო.
ევერტონთან მიღებული ტრავმისა და რამდენიმე მატჩის გამოტოვების შემდეგ, მასპინძელთა სასტარტო შემადგენლობაში გიორგი მამარდაშვილი დაბრუნდა.
შეხვედრაში ანგარიში სწრაფი გოლით გაიხსნა. მე-6 წუთზე საჯარიმოს გარედან დარტყმით რაიან გრავენბერხმა ლივერპული წინ გაიყვანა.
35-ე წუთზე ლონდონელებმა ანგარიში გაათანაბრეს. ჯარიმიდან ენცო ფერნანდესის ცბიერმა ჩაწოდებამ და უესლი ფოფანას მოქმედებამ ყველა დააბნია და ბურთი ძელიდან მამარდაშვილის კარში აღმოჩნდა.
მეორე ტაიმში თამაშგარე მდგომარეობის გამო კოულ პალმერის გოლი არ ჩაითვალა, ანგარიში კი აღარ შეცვლილა და მატჩი ფრედ (1-1) დასრულდა.
გიორგი მამარდაშვილმა 2 მოგერიება დააგროვა და Sofascore-სგან 6.9 შეფასება დაიმსახურა.
ლივერპული 59 ქულით მე-4 ადგილზეა და ასტონ ვილას, რომელსაც 1 მატჩით ნაკლები აქვს, 1 ქულით უსწრებს, ჩელსი კი 49 ქულით მე-9 პოზიციაზეა და ევროზონაში მყოფ ბრენტფორდს 2 ქულით ჩამორჩება.
