VIDEO: როგორ აჯობა ვერსტაპენმა კარტინგის 100 მრბოლელს?

მაქს ვერსტაპენმა Red Bull-ის მიერ ორგანიზებულ Max vs 100-ში, ისტორიაში ყველაზე მასშტაბურ კარტინგის რბოლაში, 100-ვე მეტოქეს გაასწრო.

ფორმულა 1-ის 4-გზის მსოფლიო ჩემპიონმა დავალება 30-წრიანი რბოლის მე-14 წრეზე შეასრულა. ღონისძიება სილვერსტოუნზე გაიმართა.

სპეციალურად ამ ღონისძიებისთვის შექმნილ სასტარტო ბადეზე ვერსტაპენი 101-ე, ბოლო პოზიციიდან დაიძრა და მთელი პელოტონის გასწრებას მხოლოდ 35 წუთი მოანდომა. სანახაობას პირდაპირ ეთერში მაყურებლები მთელი მსოფლიოდან ადევნებდნენ თვალს.

ღონისძიების მასშტაბი უკვე სასტარტო ბადის ფორმირებისას ნათლად გამოჩნდა. ზემოდან გადაღებულ კადრებში სილვერსტოუნის ასფალტზე რიგებად ჩამწკრივებული 101 კარტი ჩანდა, ვერსტაპენი კი ბოლო პოზიციაზე იდგა.

მის წინ მსოფლიოს სხვადასხვა ქვეყნიდან შერჩეული სპორტსმენები, მოთამაშეები, კონტენტ-კრეატორები, სტრიმერები, ჟურნალისტები და გულშემატკივრები იყვნენ.