ევროლიგაზე დუბაიმ ვირტუს ბოლონია 93:75 დაამარცხა და იტალიურ გუნდთან ისტორიაში პირველი გამარჯვება მოიპოვა.
გასულ სეზონში დუბაიმ მეტოქესთან ორივე შეხვედრა წააგო.
ეს შეხვედრა განსაკუთრებით ემოციური აღმოჩნდა თორნიკე შენგელიასთვის, რომელიც ბოლონიაში დაბრუნდა. ქართველმა ფორვარდმა ვირტუსში თითქმის 4 სეზონი გაატარა.
მატჩის დაწყებამდე კლუბმა შენგელიას სპეციალური დახვედრა მოუწყო და მისი დიდების დარბაზში შეყვანა ოფიციალურად გამოაცხადა.
ქართველი კალათბურთელი მოედანზე ოჯახის წევრებთან ერთად გავიდა, მასპინძელი გუნდის გულშემატკივრები კი მის სახელს სკანდირებდნენ.
შენგელიამ შეხვედრა 14 ქულით დაასრულა და ევროლიგის კარიერაში 4000-ქულიან ნიშნულამდე მხოლოდ 11 ქულა აშორებს.
ამ შედეგის დაფიქსირების შემთხვევაში ის ტურნირის ისტორიაში მე-9 კალათბურთელი გახდება, რომელიც აღნიშნულ ზღვარს მიაღწევს.
დუბაი 7 მოგებითა და 3 მარცხით ევროლიგის სატურნირო ცხრილში მე-6 ადგილს იკავებს და ლიდერთა ჯგუფში მყოფ რამდენიმე გუნდს იდენტური შედეგი აქვს.
ევროლიგის მომდევნო შეხვედრას დუბაი 12 ნოემბერს, სტუმრად ოლიმპიაკოსთან გამართავს.
