VIDEO: უიმბლდონის ჩეხურ ფინალში ნოსკოვამ მუხოვა დაამარცხა

თავის კარიერაში დიდი სლემის პირველივე ფინალში ლინდა ნოსკოვამ ჩოგბურთის მწვერვალი დაიპყრო.

21 წლის, მე-9 ნომრად განთესილმა ჩოგბურთელმა უიმბლდონის 2026 წლის ქალთა ერთეულთა თანრიგის ჩეხურ ფინალში კაროლინა მუხოვა დაამარცხა, რომელთან ერთადაც 2024 წლის პარიზის ოლიმპიადაზე წყვილთა თანრიგში ასპარეზობდა.

ნოსკოვამ მე-10 ნომრად განთესილი მეტოქე 6:2, 5:7, 6:3 დაამარცხა და უიმბლდონის ჩემპიონობა მოიპოვა. ამგვარად, ის ბოლო ათწლეულის განმავლობაში „ვენუს როუზუოტერის თასის“ მე-10 განსხვავებული მფლობელი გახდა.

21 წლისა და 237 დღის ასაკში ნოსკოვა ბოლო 15 წლის განმავლობაში უიმბლდონის ქალთა ერთეულთა თანრიგის ყველაზე ახალგაზრდა ჩემპიონი გახდა.

მან თანამემამულე პეტრა კვიტოვას შედეგი გაიმეორა, რომელიც ფინალს სამეფო ლოჟიდან ადევნებდა თვალს და ორივე ჩეხ ჩოგბურთელს გულშემატკივრობდა.

WTA-ს რეიტინგში კარიერის საუკეთესო შედეგის მიღწევის შემდეგ მსოფლიოს მე-7 ჩოგანს უკვე შეუძლია, საკუთარ თავს დიდი სლემის ჩემპიონი უწოდოს. ნოსკოვამ კარიერაში პირველი დიდი ტიტული 2 საათსა და 28 წუთში მოიპოვა.

მუხოვამ, რომელიც წარსულში როლან გაროსის ფინალისტი იყო, მე-2 სეტში 5 მატჩ-პოინტი გადაარჩინა და შეხვედრა გადამწყვეტ სეტამდე მიიყვანა.

თუმცა მსოფლიოს ახალმა მე-6 ჩოგანმა ნოსკოვას მძლავრ შეტევებს ვეღარ გაუძლო და მეექვსე მატჩ-პოინტზე დამარცხდა.

ასე გახდა ლინდა ნოსკოვა ცენტრალური კორტის წლევანდელი დედოფალი.