მარტივად მოგებული ნახევარფინალები - უიმბლდონის ფინალი გაირკვა

მსოფლიოს პირველმა ჩოგანმა უიმბლდონის ცენტრალურ კორტზე ბრწყინვალე გამარჯვება მოიპოვა.

იანიკ სინერმა 39 წლის ჯოკოვიჩი 6:4, 6:4, 6:4 დაამარცხა, სერბი ჩოგბურთელის მორიგი მცდელობა კი, 25-ე დიდი სლემის ტიტული მოეგო, მისთვის უკვე კარგად ნაცნობ დაბრკოლებას შეეჯახა.

სინერს ტურნირზე სეტი აღარ წაუგია მას შემდეგ, რაც პირველ წრეში, არცთუ დამაჯერებელი თამაშის ფონზე, მიომირ კეცმანოვიჩის დასამარცხებლად გადამწყვეტი სეტი დასჭირდა.

აღსანიშნავია, რომ უიმბლდონამდე იტალიელს ბალახის საფარზე არცერთ ტურნირში არ უთამაშია, რაც მის კარიერაში პირველად მოხდა.

24 წლის იტალიელი ფინალის ფავორიტად მიიჩნევა, სადაც საფრანგეთის ღია პირველობის ჩემპიონ ზვერევს დაუპირისპირდება.

სინერისთვის ეს დიდი სლემის ტურნირების მეშვიდე ფინალი იქნება. მან მსოფლიოს მე-3 ჩოგანთან ბოლო 9 შეხვედრა მოიგო.

სინერი დიდი სლემის მე-5 ტიტულის მოპოვებას ცდილობს, რაც მას თავისი დიდი მეტოქის, კარლოს ალკარასის მაჩვენებელთან ორ ტიტულამდე დააახლოებს. ალკარასი ამჟამად მაჯის ტრავმის გამო ვერ თამაშობს.

ჯოკოვიჩი კვლავ ცდილობდა მარგარეტ კორტთან არსებული თანაფარდობის დარღვევას და დიდი სლემის ერთეულთა თანრიგში მოპოვებული ტიტულების რაოდენობით ყველა დროის რეკორდსმენი გამხდარიყო.

თუმცა სერბ ჩოგბურთელს საკმარისი ძალა აღარ აღმოაჩნდა იმისთვის, რომ სინერისთვის სერიოზული წინააღმდეგობა გაეწია. იტალიელმა დომინანტური თამაში აჩვენა და ჯოკოვიჩის წინააღმდეგ 40 მომგებიანი დარტყმა შეასრულა.

უიმბლდონის მე-2 ფინალისტმა ალექსანდერ ზვერევმაც თავისი მატჩი 3 სეტში მოიგო და ბრიტანელი ფერი 7-6, 6-2, 6-4 დაამარცხა.

სინერისა და ზვერევის ფინალური მატჩი 12 ივლისს გაიმართება.