VIDEO: ვ ე მ ბ ა ნ ი ა მ ა - სან ანტონიომ ჩემპიონს ორი ოვერტაიმით სტუმრად მოუგო

დასავლეთ კონფერენციის ფინალური სერიის პირველ მატჩში, ვიქტორ ვემბანიამამ მოქმედ ჩემპიონ ოკლაჰომა სითი თანდერთან სტუმრად შოუ მოაწყო და სან ანტონიო სპერსს 2 ოვერტაიმის შემდეგ მოაგებინა - 122:115.

ფრანგმა ვარსკვლავმა 41 ქულა, 24 მოხსნა, 3 ასისტი, 1 ჩაჭრა და 3 დაფარება მიითვალა და NBA-ის საპლეიოფო ეტაპის ისტორიაში ყველაზე ახალგაზრდა გახდა, ვინც 40+ ქულა და 20+ მოხსნა ჩაიწერა აქტივში - 22 წლისა და 134 დღის ასაკში. აქამდე რეკორდი ლეგენდარულ კარიმ აბდულ-ჯაბარს ეკუთვნოდა - 1970 წლის ფინალებში ასეთივე შედეგი 22 წლისა და 343 დღის ასაკში დააფიქსირა.

"ეს სურვილების ომი იყო... ორივე გუნდმა მენტალური სიმტკიცის მაგალითი აჩვენა. თითოეული მოთამაშისგან თითოეულ წამში 100%-იანი სიზუსტით თამაში გვჭირდებოდა", - აღნიშნა სპერსის მთავარმა მწვრთნელმა, მიტჩ ჯონსონმა.

ვემბის გარდა, ასევე ორმაგი დუბლი შეასრულეს მისივე თანაგუნდელებმა - დილენ ჰარპერმა (24 ქულა, 11 მოხსნა, 6 ასისტი) და სტეფონ ქასლმა (17 ქულა, 6 მოხსნა, 11 ასისტი).

ორმაგი დუბლი ჰქონდა NBA-ის ზედიზედ მეორე სეზონის MVP შაი გილჯეს-ალექსანდერს (24 ქულა, 3 მოხსნა, 12 ასისტი), თუმცა პირველ ტაიმში თითქმის 3-წლიან პერიოდში სროლების პირადი ანტირეკორდი დააფიქსირა - 5-დან 1 ბურთი ჩააგდო. 

სხვა მოთამაშეთაგან, ალექს კარუზომ 31 ქულა, 2 მოხსნა, 1 ასისტი მიითვალა, ხოლო ჯეილენ უილიამსმა 26 ქულა, 7 მოხსნა, 3 ასისტი.

აღსანიშნავია, რომ OKC კონფერენციის ფინალამდე მშრალად მივიდა - ფინიქსიც და ლეიკერსიც 4:0 გაანადგურა. დღევანდელი მარცხით, მოქმედი ჩემპიონის 9-მატჩიანი საპლეიოფო მოგებათა სერია შეწყდა.

NBA-ის პლეი-ოფების ისტორიაში მეექვსედ მოხდა, როცა გამარჯვებულის გამოსავლენად 2 ოვერტაიმი გახდა საჭირო - ბოლოს ასეთი რამ 2013 წელს, სწორედ სან ანტონიო სპერსისა და გოლდენ სტეიტ უორიორსის სერიისას მოხდა.

სერიის მე-2 შეხვედრა ისევ ოკლაჰომაში, 21 მაისის 04:30 საათიდან გაიმართება.