ჰაიტისთან მატჩში მიღებული ტრავმის შემდეგ, ბარსელონას თავდამსხმელ რაფინიას მხარდაჭერა მისმა თანაგუნდელმა და მადრიდის რეალის ვარსკვლავმა, ვინისიუს ჟუნიორმა გამოუცხადა.
მიუხედავად იმისა, რომ საკლუბო დონეზე ფეხბურთელები მოსისხლე მტრების რიგებში ირიცხებიან, ეროვნულ ნაკრებში მათ კლუბებს შორის არსებული დაძაბულობა გვერდზე გადადეს.
რაფინიამ შეხვედრის მხოლოდ 40 წუთი ითამაშა, რის შემდეგაც მარჯვენა ფეხის კუნთის ტკივილის გამო მოედნის დატოვება მოუწია. ბრაზილიის ფეხბურთის კონფედერაციამ დაადასტურა, რომ ფეხბურთელს დამატებითი სამედიცინო შემოწმება ჩაუტარდება. მატჩის შემდგომ მედიასთან საუბრისას ვინისიუსმა აღნიშნა, რომ ტრავმის მიღება ყოველთვის მძიმეა, განსაკუთრებით რაფინიასთვის, რომელმაც მიმდინარე სეზონში დაზიანებების გამო ისედაც ბევრი იზარალა.
მადრიდელთა ვინგერმა იმედი გამოთქვა, რომ დაზიანება სერიოზული არ აღმოჩნდება და რაფინია მსოფლიო ჩემპიონატის ბოლომდე გუნდთან დარჩენას შეძლებს. კარიბის ზღვის აუზის გუნდთან მოპოვებული 3:0 გამარჯვების მიუხედავად, კარლო ანჩელოტის გუნდს ჯგუფიდან გასასვლელად ბოლო ტურში შოტლანდიასთან მაინც სჭირდება სასურველი შედეგის მიღწევა.
