ზეედორფი: "არსენალი ჩემპიონების გუნდია"

კლარენს ზეედორფმა არსენალი ჩემპიონების გუნდად მოიხსენია მას შემდეგ, რაც სამშაბათს მეთოფეებმა ჩემპიონთა ლიგის ფინალს მიაღწიეს.

მიკელ არტეტას გუნდმა ემირეიტსზე გამართულ ნახევარფინალურ განმეორებით შეხვედრაში ატლეტიკო მადრიდი 1:0 დაამარცხა. ერთადერთი და გამარჯვების გოლი პირველი ტაიმის მიწურულს ბუკაიო საკამ გაიტანა. გასულ კვირას მეტროპოლიტანოზე გამართული პირველი დაძაბული მატჩი ფრედ დასრულდა, სადაც ვიქტორ gიოკერეშის პენალტს ხულიან ალვარესმა თერთმეტმეტრიანიდანვე უპასუხა.

ჩრდილოეთ ლონდონში არსენალმა საშინაო უპირატესობა გამოიყენა და ბოლო 20 წლის განმავლობაში ჩემპიონთა ლიგის პირველ ფინალში გავიდა. ეს ასევე გუნდისთვის პირველი ევროპული ფინალია 2019 წლის შემდეგ, როდესაც ისინი ევროპა ლიგაზე ჩელსისთან დამარცხდნენ. მატჩის შემდეგ Amazon Prime Video-ს ეთერში ზეედორფმა, რომელსაც ევროპის თასი ოთხჯერ აქვს მოგებული აიაქსის, მადრიდის რეალისა და მილანის შემადგენლობაში, აღიარა, რომ პრემიერ ლიგის ლიდერებმა ნამდვილი ჩემპიონების თამაში აჩვენეს:

დღეს ჩემპიონების გუნდი ვნახე. დასაწყისიდან ბოლომდე ისინი აკონტროლებდნენ ვითარებას. მათ იციან, როგორ დაიცვან თავი. გაბრიელი დღეს შთამბეჭდავი იყო. ადრე ვნერვიულობდით, მაგრამ მთელი გუნდი მშვიდი და თავდაჯერებული ჩანდა. მათ ბოლო წუთამდე ყველაფერი გაიღეს.

ამ თვის ბოლოს, ბუდაპეშტში, პუშკაშ არენაზე გასამართ ფინალში არსენალი ბაიერნსა და მოქმედ ჩემპიონ პსჟ-ს შორის გამარჯვებულს შეხვდება. აღსანიშნავია, რომ გასულ სეზონში სწორედ პარიზულმა კლუბმა გამოაგდო მეთოფეები ტურნირიდან ამავე ეტაპზე, რის შემდეგაც ფინალში ინტერი გაანადგურა.