ინგლისის პრემიერ ლიგის 33-ე ტურში ჩელსიმ სტემფორდ ბრიჯზე მანჩესტერ იუნაიტედს უმასპინძლა.
მატჩის ბედი ერთადერთმა გოლმა გადაწყვიტა, რომელიც პირველი ტაიმის ბოლოს გავიდა. 43-ე წუთზე მარჯვენა ფლანგიდან ბრუნო ფერნანდეშის საჯარიმოში პასის შემდეგ, სტუმრები წინ მატეუს კუნიამ გაიყვანა.
აღსანიშნავია, რომ პორტუგალიელი ნახევარმცველისთვის პრემიერ ლიგის მიმდინარე სეზონში ეს მე-18 საგოლე გადაცემა აღმოჩნდა და ის ტიერი ანრის რეკორდს კიდევ უფრო მიუახლოვდა.
შეხვედრის დარჩენილ ნაწილში ჩელსიმ ანგარიშის გათანაბრება ვერ მოახერხა და 3 ქულა წითელ ეშმაკებს დარჩათ. ლიამ როსენიორის გუნდმა პრემიერ ლიგაში ზედიზედ მე-4 მატჩი წააგო, თანაც ისე, რომ გოლის გატანაც ვერ მოახერხა და ახლა 48 ქულით მე-6 ადგილზეა.
ლონდონელები ჩემპიონთა ლიგის ზონას 4 ქულით ჩამორჩებიან. კერიკის შეგირდებს კი 58 ქულა დაუგროვდათ და პრემიერ ლიგის ცხრილში მე-3 ადგილს იკავებენ.
