მეცის ოფიციალური გვერდის განცხადებით, გიორგი წიტაიშვილი კლუბის ახალი დანამატია. ქართველი ფრანგულ გუნდში ერთწლიანი იჯარის წესით ითამაშებს.
გიორგი მიქაუტაძის შემდეგ გიორგი წიტაიშვილი მეცის ისტორიაში მეორე ქართველი ფეხბურთელი ხდება.
საქართველოს ნაკრების ფეხბურთელი საფრანგეთში კიევის დინამოდან გადავიდა, რომელთანაც მას კონტრაქტი სწორედ მომდევნო ზაფხულამდე აკავშირებს.
გასული სეზონი წიტაიშვილმა ესპანურ გრანადაში გაატარა და ლა ლიგა 2-ში ჩატარებულ 36 მატჩში 7 გოლი და 4 საგოლე გადაცემა მიითვალა.
"ძალიან მიხარია აქ ყოფნა და ამ დიდებულ გუნდში გადმოსვლა. ქართველებს მეცთან კარგი მოგონებები აქვთ. ჟორჟს აქ გადმოსვლამდე ველაპარაკე და მან მხოლოდ კარგი რაღაცები მითხრა ჩემს ახალ კლუბზე.
ამიტომაც გადაწყვეტილება, რომ მეცში გადმოვსულიყავი ძალიან სწრაფად მივიღე. იმედი მაქვს, კლუბს ლიგა 1-ში დარჩენაში დავეხმარები და ჩემს საუკეთესო ვერსიას ვაჩვენებ. აქ მოსაგებად ვარ და არა გასართობად." - განაცხადა წიტაიშვილმა კონტრაქტის გაფორმების შემდეგ.
მეცი უმაღლეს დივიზიონში გასულ სეზონში დაწინაურდა, შესაბამისად წიტაიშვილი ლიგა 1-ის ქართული ლეგიონის ახალი წევრია (ხვიჩა კვარაცხელია, გიორგი მიქაუტაძე).
