VIDEO: მიქაუტაძის მე-7 გოლი ლა ლიგაში - ვილიარეალმა ხეტაფესთან წააგო

ესპანეთის ლა ლიგის 24-ე ტურში ვილიარეალი ხეტაფეს ესტუმრა.

მატჩი სათადარიგო სკამზე დაიწყო გიორგი მიქაუტაძემ, რომელიც თამაშში მეორე ტაიმში ჩაერთო.

ანგარიში 41-ე წუთზე მაურო არამბარიმ გახსნა, რომელმაც პენალტი ზუსტად შეასრულა და ხეტაფეს პირველი ტაიმი მოაგებინა. 53-ე წუთზე მარტინ სატრიანომ უკვე ორამდე გაზარდა მასპინძელთა უპირატესობა. 65-ე წუთზე ტეიჯონ ბუკანანი გიორგი მიქაუტაძემ შეცვალა, რომელმაც შემოსვლიდან 11 წუთში გოლის გატანა შეძლო.

76-ე წუთზე ქართველს თანაგუნდელისგან დარტყმული ბურთი რიკოშეტით საჯარიმოში მიუვიდა, მეტოქე მცველი ეფექტური მოძრაობით ჩამოიშორა, შემდეგ ბურთი ძელს გაარტყა და ძელიდან მისული ბურთი უკვე ცარიელ კარში შეაგდო.

ვილიარეალმა ანგარიშის გათანაბრება ვეღარ შეძლო და დამარცხდა. მარსელინოს გუნდი მე-4 ადგილზე რჩება და მადრიდის ატლეტიკოს მსგავსად 45 ქულა აქვს.

გიორგი მიქაუტაძემ კი ლა ლიგის მიმდინარე სეზონში მე-7 გოლის გატანა შეძლო, ამასთან ქართველის ანგარიშზე 4 საგოლე გადაცემაცაა.