ვიდეო: ყველაზე ახალგაზრდა ქვეყანას უდიდეს სენსაციამდე ცოტა დააკლდა

2024 წლის პარიზის ოლიმპიადის დაწყებამდე ცოტა დრო რჩება, საკალათბურთო ტურნირისთვის მზადება კი გრძელდება. მორიგ ამხანაგურ მატჩში აშშ სამხრეთ სუდანის ნაკრებს დაუპირისპირდა და კინაღამ სენსაციურადაც დამარცხდა.

რა თქმა უნდა, ამერიკელთა სასტარტო შემადგენლობა ვარსკვლავური იყო (კარი, ჰოლიდეი, ბუკერი, ჯეიმსი, ემბიდი), თუმცა ამას მოწინააღმდეგისთვის ხელი არ შეუშლია.

მატჩის პირველი ტაიმი სამხრეთ სუდანელებმა 44-58 მოიგეს, რაც უკვე ძალიან დიდი სენსაცია იყო.

შეხვედრის მეორე ნახევარში ამერიკელებმა გაქცევა მოახერხეს და თამაში ქულა-ქულაში წავიდა, რამაც ბოლო წამებამდეც მიაღწია, სამხრეთ სუდანელებს ბოლო სროილით შეეძლოთ მატჩის მოგება, თუმცა ეს ვერ მოახერხეს და საბოლოოდ აშშ-მ დაძაბულ ბრძოლაში 101-100 იმარჯვა.

გამარჯვებული გუნდიდან გამორჩეული ლებრონ ჯეიმსი იყო, რომელმაც 23 ქულა, 6 მოხსნა და 6 შედეგიანი გადაცემა მიითვალა, ენტონი დევისმა კი ორმაგი დუბლი შეასრულა (15 ქულა, 11 მოხსნა), სამხრეთ სუდანის ნაკრებს კი მარიალ შაიოკმა ულიდერა, რომელმაც 25 ქულა ჩააგდო.

მიუხედავად მარცხისა, სამხრეთ სუდანელებმა ასეთი მატჩით მაინც დიდი სენსაცია მოახდინეს და მსოფლიოს მასშტაბით უდიდესი პატივისცემა დაიმსახურეს. ეს ხომ მსოფლიოში ყველაზე ახალგაზრდა ქვეყანაა, რომელმაც დამოუკიდებლობა სულ რაღაც 2011 წელს მოიპოვა და წელს ოლიმპიური დებიუტანტი იქნება.

ჯერ კიდევ 5 წლის წინ ქვეყანაში კალათბურთის დახურული დარბაზი არ არსებობდა. სამხრეთ სუდანის ნაკრების მთავარი მწვრთნელი NBA-ს ყოფილი მოთამაშე და ამჟამად ჰიუსტონ როკეტსის ასისტენტი მწვრთნელი როიალ აივია, კალათბურთის ფედერაციის პრეზიდენტი კი ასევე NBA-ს ყოფილი მოთამაშე ლუოლ დენგია, რომელიც აივისაც უწევს ასისტენტობას და ცოტა ხნის წინ თავადაც იყო ნაკრების მთავარი მწვრთნელი.

აშშ და სამხრეთ სუდანი ერთმანეთს ოლიმპიადის ჯგუფურ ეტაპზეც შეხვდებიან.