დღეს მუნდიალის მეორე ნახევარფინალისტი გაირკვევა.
მსოფლიო ჩემპიონატის მეორე მეოთხედფინალში მოქმედი ევროპის ჩემპიონი ესპანეთის ნაკრები ბელგიას დაუპირისპირდება.
ესპანეთი ამ მუნდიალზე მშრალ სერიას აგრძელებს - უნაი სიმონს ხუთ მატჩში ჯერ გოლიც არ აქვს გაშვებული და რეკორდს რეკორდზე ხსნის. წინა ეტაპზე ფურია როხამ კრიშტიანუ რონალდუ გაუშვა სახლში და როგორც ჩანს, საბოლოოდ მუნდიალის გარეშე დატოვა, იქამდე კი ლუის დე ლა ფუენტეს ბიჭებმა ავსტრია დატოვეს უშანსოდ.
რაც შეეხება ბელგიას, გუნდმა 1/16 ფინალში ბეწვის ხიდზე გაიარა, როცა სენეგალთან 85-ე წუთისთვის 0:2-ს მარცხდებოდა, თუმცა თამაშის შემოტრიალება მოახერხა და დამატებით დროში მოიგო კიდეც, 1/8-ფინალში კი რუდი გარსიას შეგირდებმა უკვე ბევრად დამაჯერებლად გაიარეს მასპინძელი აშშ-ს ბარიერი, რომელსაც ბალოგუნის სრულიად აბსურდულად გაუქმებულმა წითელმა ბარათმაც ვერ უშველა.
ამ წყვილში გამარჯვებული დღეისთვის ტურნირის მთავარ ფავორიტ საფრანგეთის ნაკრებს დაუპირისპირდება, რომელმაც გუშინ საკმაოდ დამაჯერებლად და პრობლემების გარეშე გაიარა მაროკოს ბარიერი.
ამ გუნდების დაპირისპირება 23 მატჩს ითვლის, საიდანაც 12 გამარჯვება ესპანეთმა მოიპოვა, 6 ბელგიამ, 5 კი ფრედ დასრულდა.
უკანასკნელი დაპირისპირება 2016 წლის სექტემბრით თარიღდება, როცა ესპანებმა 2:0 მოიგეს.
მსოფლიო ჩემპიონატზე გუნდების ამ დრომდე ერთადერთი მატჩი 1986-ში გაიმართა, როცა ამავე სტადიაზე, 1/4 ფინალში, მატჩი ფრედ 1:1 დასრულდა, პენალტებში კი ბელგია გახდა გამარჯვებული და 1/2 ფინალშიც გავიდა.
სავარაუდო შემადგენლობები
ესპანეთი: სიმონი, კუკურელია, ლაპორტი, კუბარსი, პორო, პედრი, როდრი, ბაენა, ოლმო, ლამინი, ოიარსაბალი
ბელგია: კურტუა, კასტანი, ნგოი, მეშელე, დე კუიპერი, ვანაკენი, ტილემანსი, დოკუ, დე ბრუინი, ტროსარი, დე კეტელარე.
