2026 წლის მსოფლიო ჩემპიონატის საკვალიფიკაციო ეტაპზე, ნიდერლანდების ნაკრებმა მალტას 4:0 მოუგო და ჯგუფში ერთპიროვნულად გალიდერდა.
შეხვედრის პირველი ორი გოლი პენალტიდან კოდი ხაკპომ გაიტანა, რაც საინტერესო მიღწევის წინაპირობა გახდა. ხაკპო, ნიდერლანდების ნაკრების ისტორიაში, 1978 წლის შემდეგ პირველი ფეხბურთელია, ვინც ერთ მატჩში ორი პენალტი შეაგდო - მაშინ ეს, მსოფლიო ჩემპიონატის შეხვედრაში - ირანთან, რობ რენსენბრინკმა გააკეთა.
ხაკპოს ნიდერლანდების ნაკრებში ჩატარებულ 43 თამაშში 17 გოლი მოუგროვდა და მოქმედ ფეხბურთელთაგან, მემფის დეპაის შემდეგ, ყველაზე მაღალი მაჩვენებელი აქვს.
თავად ნაკრების ყველა დროის ბომბარდირმა დეპაიმ გუშინაც გაიტანა და რობინ ვან პერსის უკვე 3 გოლით დაშორდა - მის ანგარიშზე 53 გოლია, ვან პერსის 50 აქვს.
