რობენს გადაასწრო - დეპაის კიდევ ერთი რეკორდი ნაკრებში

მემფის დეპაი ნიდერლანდების ნაკრების ისტორიის გადაწერას აგრძელებს და კიდევ ერთი რეკორდი დაამყარა.

ნარინჯისფრების ყველა დროის საუკეთესო ბომბარდირმა, ფინეთთან 4:0 მოგებული მატჩის შემდეგ, ნაკრების ყველა დროის საუკეთესო ასისტენტის სტატუსიც ერთპიროვნულად მიიღო.

საქმე ისაა, რომ დღევანდელ შეხვედრამდე, დეპაისა და არიენ რობენს ნაკრებში 34-34 საგოლე პასი ჰქონდათ, მემფისმა კი დღეს 2 ასისტი გააკეთა, 36 დააგროვა და ამ რეკორდსაც ერთპიროვნულად დაეუფლა.

ტოპ-5 ნიდერლანდელი, რომლებსაც ნაკრებში ყველაზე მეტი ასისტი აქვთ:

მემფის დეპაი - 36 საგოლე პასი (106 მატჩში);

არიენ რობენი - 34 საგოლე პასი (96 მატჩში);

უესლი სნეიდერი - 32 საგოლე პასი (134 მატჩში);

რაფაელ ვან დერ ვაარტი - 29 საგოლე პასი (129 მატჩში);

იოჰან კრუიფი - 28 საგოლე პასი (48 მატჩში).

ამ სიის მე-7 პოზიციაზე დენზელ დუმფრისია, ვისაც, დეპაის შემდეგ, მოქმედ ფეხბურთელთაგან ნიდერლანდების ნაკრებში ყველაზე მეტი საგოლე პასი აქვს - 21.

აღსანიშნავია ისიც, რომ დეპაი ზედიზედ 7 სანაკრებო მატჩია, მოედანს საგოლე მოქმედების გარეშე არ ტოვებს - ჯამურად ამ შეხვედრებში 8 გოლი და 4 ასისტი აქვს.

მალენსა და ვან დეიკზე გაკეთებული საგოლე გადაცემების გარდა, დეპაიმ პენალტიდან გოლიც გაიტანა და რობინ ვან პერსის უკვე 4 ბურთით დაშორდა - 54 სანაკრებო გოლი მოაგროვა.

ფინეთის დამარცხების შედეგად, ნიდერლანდებმა შესარჩევის ჯგუფში 16 ქულა მოაგროვა და მე-2 ადგილოსან პოლონეთს 3 ქულით უსწრებს. სათამაშო კიდევ 2 ტურია - მომდევნოში სწორედ პოლონეთს ესტუმრებიან.