ბარსელონასა და ესპანეთის ნაკრების ლეგენდარული ნახევარმცველი, ანდრეს ინიესტა მომავალი სეზონიდან სამწვრთნელო კარიერას იწყებს.
ფაბრიციო რომანოს ინფორმაციით, 42 წლის ვეტერანი დუბაის კლუბ გალფ იუნაიტედს ჩაიბარებს.
ფენომენალური საფეხბურთო კარიერის დასრულების შემდეგ, ინიესტა იმ ელიტარული მოთამაშეების სიას უერთდება, რომლებიც მწვრთნელობაზე გადავიდნენ. მისი ახალი გუნდი, გალფ იუნაიტედი, რომელიც 2019 წელს დაარსდა, არაბთა გაერთიანებული საამიროების პირველ დივიზიონში ასპარეზობს. მიმდინარე სეზონში გუნდს საქმეები კარგად არ მიდის, 15 გუნდში მეათე ადგილზეა და ესპანელ ლეგენდას მომავალ სეზონში კლუბის კრიზისიდან გამოყვანა მოუწევს.
ბარსელონადან 2018 წელს წასვლის შემდეგ, ინიესტა 5 წლის განმავლობაში იაპონურ ვისელ კობეში თამაშობდა, კარიერის ბოლო სეზონი კი საამიროების ემირეიტს კლუბში გაატარა, რის შემდეგაც ბუცები ლურსმანზე ჩამოკიდა.
სპორტიდან წასვლისას ინიესტამ აღნიშნა, რომ მომავალში მშობლიურ კლუბში დაბრუნება სურს: „მსურს ცხოვრების გარკვეულ ეტაპზე ბარსელონაში დავბრუნდე. თუ ოდესმე მწვრთნელი გავხდები, ეს იქნება ინიესტას პროფილის გუნდი“. ახლა ის ზუსტად იმავე გზას გადის, რაც მისმა ძველმა პარტნიორმა ჩავიმ გაიარა, მანაც სამწვრთნელო კარიერა ახლო აღმოსავლეთში, კატარულ ალ სადში დაიწყო, სანამ ბარსელონას ჩაიბარებდა.
