აპელაცია უარყოფილია — რონალდუმ იუვენტუსს სასამართლო საბოლოოდ მოუგო

სასამართლომ კრიშტიანუ რონალდუსთან დავაში იუვენტუსის აპელაცია არ დააკმაყოფილა.

შეგახსენებთ, რომ ფეხბურთელს ტურინულ კლუბთან საიდუმლო შეთანხმება ჰქონდა, რომლის მიხედვითაც იუვენტუსს პანდემიის პერიოდში ხელფასის გადახდის გადავადება შეეძლო და ასეც მოიქცა.

თუმცა, ბიანკონერიმ პორტუგალიელს მისი კუთვნილი 19.9 მილიონი ევრო, რომელიც პანდემიის დროს შეუკავა, საერთოდ აღარ გადაუხადა. არადა, შეთანხმების თანახმად, ამის ვალდებულება ფეხბურთელის კლუბიდან წასვლის შემთხვევაშიც დარჩებოდა ძალაში. საბოლოოდ, რონალდუმ ეს საკითხი სასამართლოში გაასაჩივრა.

2024 წელს სასამართლომ რონალდუს სარჩელი ნაწილობრივ დააკმაყოფილა და კომპენსაციის ოდენობა 9,8 მილიონ ევრომდე შეამცირა. თუმცა, იუვენტუსი არც ამ თანხის გადახდის ვალდებულებას დაეთანხმა და სააპელაციო სასამართლოს მიმართა.

ტურინის შრომითი დავების მოსამართლემ, ჯანლუკა რობალდომ იუვენტუსის აპელაცია უარყო — ბიანკონერის უკვე გადახდილი თანხის დაბრუნების შესაძლებლობა აღარ აქვს. პროცენტების გათვალისწინებით, საერთო თანხამ დაახლოებით 11 მილიონი ევრო შეადგინა.

იუვენტუსი სასამართლო ხარჯებს თავად დაფარავს, თუმცა ეს კლუბის ბიუჯეტზე გავლენას არ მოახდენს, რადგან აღნიშნული ხარჯები უკვე გათვალისწინებული იყო 2023–2024 წლების ფინანსურ გეგმაში.