ნიდერლანდების ნაკრების ყველა დროის საუკეთესო ბომბარდირი, მემფის დეპაი ნარინჯისფრების შეკრებას დაგვიანებით შეუერთდება. დეპაი აცხადებს, რომ ბრაზილიაში მისი პასპორტი მოიპარეს - კორინთიანსში თამაშობს.
"მოთამაშემ განაცხადა, რომ მისი პასპორტი მოიპარეს, რის გამოც კვირა საღამოს ბრაზილიიდან დაგეგმილი რეისით ვერ გამოფრინდა.
ის ყველაფერს აკეთებს, რომ რაც შეიძლება მალე გამოემგზავროს. მოსალოდნელია, რომ გუნდს მალე შემოუერთდება", - წერს ნიდერლანდების საფეხბურთო ასოციაცია.
31 წლის დეპაიმ რობინ ვან პერსის რეკორდი სექტემბერში გააუმჯობესა და ნიდერლანდების ნაკრების ყველა დროის საუკეთესო ბომბარდირი გახდა - ლიეტუვასთან შესრულებული დუბლით, 52 გოლი მოაგროვა.
იმის მიუხედავად, რომ ნიდერლანდური ფეხბურთის მესვეურები იმედიანად არიან, არაა გამორიცხული, თავდამსხმელს მალტასთან ხუთშაბათს გასამართი მატჩის გამოტოვება მაინც მოუწიოს. მალტელთა შემდეგ, კუმანის გუნდი, კვირას, ფინეთს უმასპინძლებს.
ნარინჯისფრებს პირველი 4 საკვალიფიკაციო მატჩიდან 10 ქულა აქვთ და პოლონეთს ბურთების სხვაობით უსწრებენ - ასევე თამაშით ნაკლები აქვთ ჩატარებული.
შეგახსენებთ, საკვალიფიკაციოს ჯგუფის გამარჯვებულები პირდაპირ ჩრდილოეთ ამერიკაში გასამართ მუნდიალზე გავლენ, ხოლო მეორეადგილოსნები პლეი-ოფს ითამაშებენ.
