ატლეტიკოს უარი: ბარსელონა ალვარესში მეტს აღარ გადაიხდის?

მადრიდის ატლეტიკოს სიჯიუტის ფონზე ბარსელონა ხულიან ალვარესის ტრანსფერზე ჭკუიდან გადასვლას არ აპირებს.

კატალონიელები რობერტ ლევანდოვსკის შემცვლელად არგენტინელ ვარსკვლავს განიხილავენ, თუმცა მადრიდელები მოლაპარაკებებზე კატეგორიულ უარს ამბობენ. ჟოან ლაპორტას მიერ მაისის ბოლოს შეთავაზებულ 100-მილიონიან წინადადებას ვადა ივლისის ბოლოს გასდის, თუმცა ბლაუგრანაში პანიკას არავინ წევს.

მას შემდეგ, რაც მარკუს რაშფორდის იჯარა დასრულდა, ბარსელონამ ენტონი გორდონი და კარიმ ადეიემი დაიმატა. ამიტომ, კლუბში მიიჩნევენ, რომ თუ გუნდიდან ფეხბურთელები არ წავიდნენ, ახალი ფორვარდის ყიდვა აუცილებელი სულაც არ არის. ცენტრალური თავდამსხმელის პოზიციაზე თამაში ფერან ტორესს, დანი ოლმოსა და რაფინიასაც თავისუფლად შეუძლიათ. კატალონიელებს არ სურთ, რომ მილიონები მხოლოდ ხმაურიანი ტრანსფერისთვის დახარჯონ.

არგენტინელმა ვარსკვლავმა მუნდიალის დროს ატლეტიკოს ხელმძღვანელობას ღიად მოსთხოვა ტრანსფერზე დაყენება, რათა ბავშვობის ოცნება აეხდინა და ბარსელონაში ეთამაშა. მიუხედავად ამისა, ატლეტიკოს ბოსმა, მიგელ ანხელ ხილ მარინმა გულშემატკივრებს პირობა მისცა, რომ 26 წლის ფორვარდს კატალონიაში არაფრით გაუშვებს. მადრიდელები თანახმა არიან ალვარესი მხოლოდ არსენალს ან პარი სენ-ჟერმენს მიჰყიდონ.

ბარსელონა 100 მილიონ ევროზე მეტის გადახდას ან გარიგებაში ფეხბურთელების ჩართვას კატეგორიულად გამორიცხავს. ახლა ჯერი თავად ალვარესზეა - ევროპა ელოდება, როგორ შეძლებს ის მადრიდული კლუბის წინააღმდეგობის დაძლევას. ჰანსი ფლიკს ახალი შემტევის დამატება სურს, თუმცა მოვლენების განვითარებას სრულიად მშვიდად აკვირდება.