ავსტრალიის ღია პირველობის ფინალური წყვილი ცნობილია

ავსტრალიის ღია პირველობის მეორე ნახევარფინალში იანიკ სინერმა ბენ შელტონი დაამარცხა.

შეხვედრა 2 საათსა და 36 წუთს გაგრძელდა და იტალიელის გამარჯვებით 7:6 (2), 6:2 6:2 დასრულდა.

მთავარი ბრძოლა ჩოგბურთელებს შორის პირველ სეტში გაიმართა - შელტონი ჯერ 2:0-ს იგებდა, შემდეგ 5:5-ზე მოიგო მეტოქის მოწოდება, სეტზეც აწვდიდა და ორი სეტ-პოინტიც ჰქონდა, თუმცა მაინც დაბრეიკდა და შემდეგ, ტაი-ბრეიკზე სეტი უშანსოდ დათმო.

დანარჩენ ორ სეტში ბრძოლა არ შედგა - სინერი ორივეში დიდ სათამაშო უპირატესობას ფლობდა და ეს ანგარიშშიც გამოსახა.

ფინალურ დაპირისპირებაში იტალიელი მე-3 გრენდ სლემის მოგებისთვის გერმანელ ალექსანდრ ზვერევს დაუპირისპირდება, რომელიც პირველი გრენდ სლემის მოგებას ცდილობს.

ზვერევმა თავის მხრივ პირველ ნახევარფინალში ნოვაკ ჯოკოვიჩს პირველი სეტი მოუგო, რის შემდეგაც სერბმა ტრავმის გამო ბრძოლა ვეღარ გააგრძელა.

ფინალური დაპირისპირება კვირას, 26 იანვარს გაიმართება.