ხულიან ალვარესის მომავალი ზაფხულის სატრანსფერო ფანჯრის ერთ-ერთი ყველაზე ცხელი თემა გახდება.
პოტენციურ მსურველებს შორის ბარსელონა, პსჟ და არსენალი არიან. ფორვარდი თავის კარიერაში მომდევნო ნაბიჯის გადასადგმელად ემზადება.
Mundo Deportivo-ს ინფორმაციით, ალვარესმა იცის პსჟ-სა და არსენალის ინტერესის შესახებ, თუმცა ის უპირატესობას ბარსელონას ანიჭებს.
არსენალის შემთხვევაში, არგენტინელს არ სურს პრემიერ ლიგაში დაბრუნდეს, სადაც ის ადრე მანჩესტერ სიტის შემადგენლობაში თამაშობდა. მიუხედავად იმისა, რომ არსენალი მისთვის მიმზიდველი კლუბია, მას ინგლისში დაბრუნება არ სურს. რაც შეეხება პსჟ-ს, ეს ვარიანტი რივერ პლეიტის ყოფილი აღზრდილისთვის სპორტული და ეკონომიკური თვალსაზრისით კიდევ უფრო მომხიბვლელია.
ლუის ენრიკესთან მუშაობის შესაძლებლობა და პარიზში ცხოვრება ხულიან ალვარესს აინტრიგებს, თუმცა მან იცის, რომ პსჟ-ში რეგულარული სათამაშო დროისთვის უდიდესი კონკურენციაა.
სწორედ ამიტომ, ატლეტიკო მადრიდის თავდამსხმელი ბარსელონას ვარიანტს ირჩევს, სადაც ის შეტევის ხაზის მთავარი ფიგურა გახდება ლამინ იამალისა და რაფინიას გვერდით. ბარსელონაში ალვარესი შეტევის წინამძღოლი იქნება და რობერტ ლევანდოვსკის გრძელვადიან შემცვლელად მოიაზრება.
კატალონიელებს სჯერათ, რომ ალვარესის გაფორმებასთან დაკავშირებით პრობლემები არ შეექმნებათ, თუმცა სატრანსფერო თანხაზე მკაცრი ლიმიტი - 100 მილიონი ევრო დააწესეს.
