მოსალოდნელია, რომ ამ ზაფხულს ბარსელონა რობერტ ლევანდოვსკის ან ფერან ტორესს დაემშვიდობება. მიუხედავად იმისა, რომ კატალონიურმა კლუბმა პოლონელს ახალი კონტრაქტი შესთავაზა, მისი წასვლის შანსი მაინც უფრო მაღალია, რადგან დარჩენის შემთხვევაში მას ხელფასის საგრძნობლად შემცირება მოუწევს.
ლევანდოვსკის მიმართ ინტერესი უკვე გამოხატეს MLS-იდან, თუმცა მას ევროპაში დარჩენის შანსიც აქვს. ერთ-ერთი ვარიანტი იტალიაა - იუვენტუსი ახალ თავდამსხმელს ეძებს, რადგან გუნდს, სავარაუდოდ, ვლაჰოვიჩი დატოვებს, რომელსაც კონტრაქტი ივნისში ეწურება.
პოლონელმა ლეგენდამ, ზბიგნევ ბონეკმა, მხარი დაუჭირა ლევანდოვსკის იუვენტუსში შესაძლო ტრანსფერს. ის თავის თანამემამულეს იდეალურ კანდიდატად მიიჩნევს იმ კლუბისთვის, რომელთან ერთადაც თავად 80-იან წლებში ჩემპიონთა ლიგა ორჯერ მოიგო.
ბონეკმა განაცხადა:
თუ მას კიდევ ორი წელი ყოველ კვირას გამარჯვებისთვის ბრძოლა სურს, იუვენტუსი დიდი გამოწვევა და იდეალური ადგილი იქნება მისთვის. ყოველთვის ვეუბნებოდი რობერტს, რომ იტალიაში ჩამოსულიყო, თუმცა ყველაფერი მის სურვილზეა დამოკიდებული. თუ მას მშვიდად პენსიაზე გასვლა უნდა, ვეტყოდი, რომ ფეხბურთს თავი დაანებოს, მაგრამ თუ ბრძოლა სწყურია, იუვენტუსი საუკეთესო არჩევანია.
რობერტს ბავშვობიდან ვიცნობ, როცა ჯერ კიდევ პოლონეთის მეორე დივიზიონში თამაშობდა. უკვე მაშინ ბევრი გოლი გაჰქონდა. შემდეგ ნაკრებში შევხვდით — მე ფედერაციის პრეზიდენტი ვიყავი, ის კი თავდამსხმელი. ხანდახან ვეხუმრებოდი: 'ამდენი გოლი იმიტომ გაგაქვს, რომ იტალიაში არასდროს გითამაშია-მეთქი'. ნამდვილმა ბომბარდირმა თავისი პოტენციალი სერია A-შიც უნდა აჩვენოს. შეიძლება ეს საყურებლად ყველაზე ლამაზი ჩემპიონატი არ არის, მაგრამ მაინც ყველაზე რთულია, განსაკუთრებით ფორვარდებისთვის.“
ლევანდოვსკის რთული გადაწყვეტილება ელის
საინტერესო იქნება, როგორ განვითარდება მოვლენები. სავსებით შესაძლებელია, რომ ის კიდევ ერთი სეზონით ბარსელონას მოთამაშედ დარჩეს, თუმცა არც ისაა გამორიცხული, კარიერის დასრულება სხვაგან ისურვოს.
