ბარტერული გარიგება? - ვის გაცვლას აპირებს არსენალი ალვარესისთვის?

სატრანსფერო ფანჯრის დასკვნით კვირაში ლონდონის არსენალის მთავარი სამიზნე ატლეტიკოს არგენტინელი თავდამსხმელი ხულიან ალვარესი გახდა.

მიკელ არტეტას გუნდი აქტიურად ცდილობს 26 წლის ვარსკვლავის გაფორმებას, თუმცა გარიგებამდე ჯერ კიდევ დიდი გზაა გასავლელი, რადგან ესპანური კლუბი ფეხბურთელის სანაცვლოდ 150 მილიონ ევროს ითხოვს.

ლეანდრო ტროსარის წასვლისა და გაბრიელ მარტინელის ალ ჰილალში სავარაუდო ტრანსფერის ფონზე, არსენალს შეტევის გაძლიერება სასწრაფოდ სჭირდება. ალვარესს ესპანეთში დარჩენა და ბარსელონაში გადასვლა ურჩევნია, თუმცა ატლეტიკო პრინციპული კონკურენტისთვის მის მიყიდვას კატეგორიულად გამორიცხავს.

ამასთან, გასულ უქმეებზე ვილიარეალთან მატჩში საკუთარმა გულშემატკივრებმა ალვარესს სტვენა დაუწყეს, რამაც მადრიდში მისი დარჩენა კიდევ უფრო გაართულა.

არსენალი სატრანსფერო თანხის შემცირებას შეეცდება, თუმცა ატლეტიკოს ფინანსური პრობლემები არ აქვს და ფასის დაწევას არ გეგმავს. ერთ-ერთ ალტერნატიულ ვარიანტად ბარტერული გარიგებაც განიხილება, სადაც შესაძლოა ვიქტორ გიოკერეში ან მარტინელი ჩაერთონ.