ლივერპულის ლეგენდამ, რობი ფაულერმა, GOAL-თან ექსკლუზიურ ინტერვიუში ჯუდ ბელინგემის მომავალზე ისაუბრა და აღნიშნა, რომ ინგლისელი ვარსკვლავის ტრანსფერი მერსისაიდულ კლუბში მომავალში სრულიად შესაძლებელია.
22 წლის ნახევარმცველი ამჟამად მადრიდის რეალის ღირსებას იცავს, თუმცა ესპანური ვოიაჟის დასრულების შემდეგ, მისი პრემიერლიგაში ხილვა რეალური გახდება.
ბელინგემმა ბირმინგემის აკადემიიდან მადრიდამდე შთამბეჭდავი გზა განვლო - ჯერ დორტმუნდის ბორუსიაში გაიბრწყინა, 2023 წელს კი ესპანურ გრანდს 103 მილიონი ევროს სანაცვლოდ შეუერთდა და ოქროს ბურთის ნომინანტთა შორისაც დამკვიდრდა. ბოლო ორ სეზონში მიღებულმა ტრავმებმა მისი პროგრესი ოდნავ შეაფერხა, ნაკრებში კი მორგან როჯერსის სახით სერიოზული კონკურენტი გამოუჩნდა. მიუხედავად ამისა, ფაულერი მიიჩნევს, რომ პრემიერლიგაში დაბრუნება ჯუდისთვის დროის საკითხია:
როგორც ლივერპულის ფანს, ენფილდზე საუკეთესო მოთამაშეების ხილვა მინდა და ჯუდიც ერთ-ერთი მათგანია. ის ახლა მსოფლიოს უდიდეს კლუბში თამაშობს, ამიტომ ნაკლებად სავარაუდოა, რომ ახლავე სურდეს წამოსვლა. თუმცა, 3, 4 ან 5 წელიწადში ყველაფერი შეიძლება მოხდეს. თუ ის რეალში აღარ ითამაშებს, პრემიერლიგა მისთვის საუკეთესო ადგილი იქნება
სანამ სატრანსფერო ჭორები რეალობად იქცევა, ბელინგემი თომას ტუხელის ინგლისის ნაკრებთან ერთად 2026 წლის მსოფლიო ჩემპიონატისთვის ემზადება. ფაულერმა ახალგაზრდა ვარსკვლავს ის კომპონენტიც დაუსახელა, სადაც თამაში სასწრაფოდ უნდა გააუმჯობესოს:
ჯუდი წარმოუდგენლად ნიჭიერია, თუმცა გარედან თუ შევხედავთ, მას თამაშში სტაბილურობა აკლია. როდესაც ნაკრების მწვრთნელს შენი წინ წასვლა უნდა, მას ასევე სჭირდება, რომ დაცვაში სწრაფად დაბრუნდე. ბელინგემი ხშირად სცოდავს იმით, რომ შეტევაში უფრო სწრაფად გარბის, ვიდრე უკან, დაცვაში ბრუნდება. აი, ამ დისციპლინის ნაკლებობა მის თამაშს ოდნავ აფერხებს
ბელინგემს მადრიდის რეალთან კონტრაქტი 2029 წლამდე აკავშირებს და ამჟამად მხოლოდ ერთ მიზანზეა კონცენტრირებული - დაეხმაროს ინგლისს ჩრდილოეთ ამერიკაში მსოფლიო ჩემპიონობის მოპოვებაში.
