ბოლო წამების დრამა და შერმადინის სტატისტიკა პირველ ტურში

ესპანეთის საკალათბურთო ჩემპიონატის პირველ ტურში გიორგი შერმადინის ტენერიფემ საკუთარ მოედანზე ყოფილ კლუბს, სარაგოსას უმასპინძლა.

დაძაბული და გარდამავალი უპირატესობით მიმდინარე შეხვედრა სტუმრების მინიმალური გამარჯვებით, 81:80 დასრულდა.

მატჩის ბედი ბოლო წამებზე გადაწყდა. მაშინ, როცა ტენერიფელები გამარჯვების შენარჩუნებას ცდილობდნენ, საფინალო სირენამდე 2 წამით ადრე ჯასტინ იავორსკიმ ორქულიანი ჩააგდო და სარაგოსას ძვირფასი გამარჯვება მოუტანა.

რაც შეეხება ქართველი ცენტრის სტატისტიკას, შერმადინი თამაშში სათადარიგო სკამიდან ჩაერთო, პარკეტზე 19 წუთი დაყო და გუნდს 5 ქულა და 4 მოხსნა შემატა.

ტენერიფეს შემადგენლობაში ყველაზე მეტი, 13 ქულა ჰაპმა ჩააგდო, ხოლო მატჩის ბომბარდირი სარაგოსელი ბელ-ჰეინსი გახდა 19 ქულით.