ბოლონიამ ინტერს პენალტებში მოუგო და სუპერ თასის ფინალში გავიდა

იტალიის სუპერ თასის მეორე ნახევარფინალურ მატჩში, რომელიც საუდის არაბეთში გაიმართა, კოპა იტალიას გამარჯვებული ბოლონია ინტერს დაუპირისპირდა.

შეხვედრაში ანგარიში სწრაფი გოლით გაიხსნა. მე-2 წუთზე მილანელები მარკუს ტურამმა დააწინაურა.

35-ე წუთზე ბოლონიელბმა ანგარიშის გათანაბრება შეძლეს. ინტერის კარში დანიშნული პენალტი ზუსტად რიკარდო ორსოლინიმ შეასრულა და ანგარიში 1-1 გახადა.

მატჩის ძირითადი დროის დარჩენილ ნაწილში ანგარიში აღარ შეცვლილა და 90 წუთის შემდეგ პენალტების სერია დაინიშნა.

ინტერის 3 გაფუჭებული პენალტის შემდეგ გადამწყვეტი თერთმეტმეტრიანი ჩირო იმობილემ შეასრულა და ბოლონიას პენალტების სერია 3-2 მოაგებინა, შედეგად ფინალში სწორედ კოპა იტალიას გამარჯვებული გავიდა.

სუპერ თასის ფინალში ბოლონია სერია ა-ს მოქმედ ჩემპიონ ნაპოლის დაუპირისპირდება, რომელმაც თავის მხრივ ინტერის თანაქალაქელი მილანი დაამარცხა.

გადამწყვეტი მატჩი საუდის არაბეთში 22 დეკემბერს გაიმართება.

VIDEO: დამაჯერებელი გამარჯვება მილანთან — ნაპოლი სუპერთასის პირველი ფინალისტია