2026 წლის მსოფლიო ჩემპიონატის წილისყრამ შოტლანდიელ ფანებს ძველი და ნაცნობი მეტოქე არგუნა.
კარლო ანჩელოტის ბრაზილია და შოტლანდია მუნდიალზე მეხუთედ შეხვდებიან. ჯგუფური ეტაპის ბოლო მატჩი მაიამიში, 24 ივნისს გაიმართება და შესაძლოა შოტლანდიისთვის ისტორიული, პლეი-ოფის საგზურის მომტანი გახდეს.
სანამ ახალი დაპირისპირება დაიწყება, გავიხსენოთ ამ გუნდების წარსული შეხვედრები მსოფლიო ჩემპიონატებზე:
1974 წელი (დასავლეთ გერმანია) – შოტლანდია 0:0 ბრაზილია
პირველი მატჩი მძიმე და უგოლო ბრძოლა გამოდგა. შოტლანდიამ მოქმედ ჩემპიონთან ქულა კი მოიპოვა და ტურნირი წაუგებლად დაასრულა, თუმცა ჯგუფიდან ბურთების უარესი შეფარდების გამო მაინც გამოვარდა.
1982 წელი (ესპანეთი) – შოტლანდია 1:4 ბრაზილია
დევიდ ნერის შორეულმა დარტყმამ შოტლანდია მოულოდნელად დააწინაურა, თუმცა ზიკოს, სოკრატესისა და ფალკაოს ბრაზილიამ მეორე ტაიმში მეტოქე გაანადგურა. ნერის გოლი შოტლანდიურ ფოლკლორში მაინც სამუდამოდ დარჩა.
1990 წელი (იტალია) – შოტლანდია 0:1 ბრაზილია
ჯგუფის ბოლო მატჩში შოტლანდიას მხოლოდ მოგება აწყობდა. გუნდი თავგანწირვით იცავდა თავს დუნგასა და რომარიოს შეტევებისგან, თუმცა 81-ე წუთზე მიულერმა გაიტანა და ბრიტანელების ოცნება დაასრულა.
1998 წელი (საფრანგეთი) – შოტლანდია 1:2 ბრაზილია
მუნდიალის გახსნითი მატჩი სტად დე ფრანსზე. ბრაზილიელთა ადრეულ გოლს ჯონ კოლინსმა პენალტით უპასუხა. თუმცა, ტომი ბოიდის საბედისწერო ავტოგოლმა შოტლანდიას ქულა წაართვა. ამის შემდეგ გუნდს მსოფლიოზე მოსახვედრად 28-წლიანი ლოდინი დასჭირდა.
ახლა კი, ენდი რობერტსონი, სკოტ მაკტომინეი და ჯონ მაკგინი შეეცდებიან, ვინისიუს ჟუნიორისა და ნეიმარის ბრაზილიასთან ეს უიღბლო სერია ერთხელ და სამუდამოდ დაასრულონ.
