2026 წლის მსოფლიო ჩემპიონატის მესამე ადგილისთვის ბრძოლაში ერთმანეთს საფრანგეთისა და ინგლისის ეროვნული ნაკრებები დაუპირისპირდებიან.
ფრანგებიც და ინგლისელებიც საკუთარ ნახევარფინალებში ფავორიტებად მიიჩნეოდნენ, თუმცა მიზნამდე ნაბიჯი დააკლდათ. დიდიე დეშამის გუნდმა ესპანეთის მყარ დაცვას ვერაფერი მოუხერხა (0:2), რითაც მათი შთამბეჭდავი საგოლე სერია შეწყდა.
თომას ტუხელის ინგლისი კი არგენტინასთან იგებდა, თუმცა მოქმედმა ჩემპიონებმა ხასიათი გამოავლინეს და მსაჯის მიერ დამატებულ დროში გამარჯვება გამოსტაცეს ხელიდან (1:2). ახლა ინგლისელები შეეცდებიან მეტოქის მწვრთნელს წასვლა გაუმწარონ და 2022 წლის მუნდიალის მეოთხედფინალში განცდილი მარცხისთვის რევანში აიღონ.
დამატებით მოტივაციას ამ მატჩს კილიან მბაპეს ბომბარდირთა დავა სძენს, რომელიც, დიდი ალბათობით, სასტარტოშიც სწორედ ამის გამო მოხვდება. ფრანგი ფორვარდი 8 გოლით მესისთან ერთად თანაბომბარდირია და ფინალამდე ერთი დღით ადრე, დავაში ერთპიროვნულად გალიდერებას შეეცდება.
მწვრთნელების კომენტარები:
თომას ტუხელი (ინგლისი): „ინგლისს შეუძლია ბოლო 60 წლის განმავლობაში თავისი საუკეთესო შედეგი დააფიქსიროს მსოფლიო ჩემპიონატებზე. სიტუაციას სწორედ ასე უნდა შევხედოთ. რა თქმა უნდა, ყველას ნიუ-იორკის ფინალში ყოფნა სურდა და არა ამ მატჩის თამაში, მაგრამ ეს არის ოფიციალური შეხვედრა მსოფლიოს ერთ-ერთ უძლიერეს ნაკრებთან და კარგი შანსია ჩვენი შესაძლებლობების კიდევ ერთხელ საჩვენებლად“.
დიდიე დეშამი (საფრანგეთი): „ეს არ არის ამხანაგური მატჩი, მაგრამ არც ის შეხვედრაა, სადაც თამაში გვინდოდა. მიუხედავად ამისა, რეალობა ასეთია. სასწორზე მესამე ადგილი დევს, რომელიც უნდა მოვიპოვოთ - ეს ჩემი, სამწვრთნელო შტაბისა და ფეხბურთელების მოვალეობაა. ყველაფერი უნდა გავაკეთოთ ამ მიზნის მისაღწევად“.
სავარაუდო შემადგენლობები:
საფრანგეთი: მენიო - გუსტო, კონატე, ლაკრუა, ლ. ერნანდესი - ზაირ-ემერი, კანტე - აკლიუში, შერკი, მბაპე - ტურამი.
ინგლისი: ჰენდერსონი - ჩალობა, გეჰი, სტოუნზი, სპენსი - მეინუ, ანდერსონი, როჯერსი - მადუეკე, კეინი, რაშფორდი.
