"ჩემთვის მეტი დრო უნდა მოეცათ", - ტიაგო მოტამ იუვედან გაშვების მიზეზებზე ისაუბრა

ტიაგო მოტამ იუვენტუსიდან გაშვების მიზეზებზე წასვლის შემდეგ პირველად ისაუბრა.

„იუვეს ჩემთვის მეტი დრო უნდა მოეცა, მიუხედავად იმისა, რომ ბოლო ორი მატჩი ძალიან ცუდი იყო. თუმცა, დირექტორებმა სხვა გზის არჩევა გადაწყვიტეს.

არაფრის გაგონება არ მინდა ჩავარდნილ სეზონზე: მე-4 ადგილთან ერთ ქულაში ვიყავით, ეს კი სეზონის დასაწყისში მთავარ მიზნად იყო დასახული.

იმედგაცრუებული პირველ რიგში იმით ვარ, რომ იტალიის თასზე და ჩემპიონთა ლიგაზე არ წაგვივიდა საქმე ისე, როგორც ველოდით.

ბევრ რამეს შევცვლიდი. ჩემს არაერთ გადაწყვეტილებას შევცვლიდი ბოლო ორ მატჩში. თუმცა, ვერ ავიტან ჩემს მიერ შესრულებული საქმის შესახებ ნათქვამ ტყუილებს. 

ახალი გუნდი გვყავდა და უამრავი ტრავმის მიუხედავად, ჩვენს მთავარ მიზანთან ახლოს ვიყავით.

ვინც ამბობს, რომ პირადი კონფლიქტები მქონდა - მატყუარაა. ყველა ფეხბურთელთან საუცხოო ურთიერთობას ვინარჩუნებდი. არასდროს მიჩხუბია არც ჯუნტოლისთან, არასდროს.

ისევე, როგორც არასდროს მითქვამს, რომ ილდიზი მესი არ არის." - აღნიშნა მოტამ.