დადიანი: „ეს შედეგი ჩვენივე გამოსასწორებელია"

იბერიას ფეხბურთელმა, ნიკოლოზ დადიანმა სენტ ტრუიდენთან წაგებული (0:2) მატჩი შეაფასა.

„საკმაოდ რთული თამაში გამოდგა. ველოდით, რომ მსგავსი თამაში იქნებოდა, მაგრამ სტარტი არ იყო ისეთი როგორიც გვინდოდა, ძალიან ცუდად დავიწყეთ.

სულ სხვანაირად ვემზადებოდით, მაგრამ სამწუხაროდ პირველივე წუთიდან მათი დომინირებით წავიდა თამაში, გოლი გაგვიტანეს, არ ჩათვალეს, შემდეგ ისევ იგივე თამაში გაგრძელდა და დარწმუნებული ვიყავი, რომ რაიმეს თუ არ შევცვლიდით, ცუდად წავიდოდა საქმე და სამწუხაროდ მაინც გავუშვით პირველი გოლი.

შემდეგ თამაში ცოტა დავალაგეთ, თუმცა ჩვენს ნახევარზე გვიწევდა თამაში, მეტოქეც კარგად გვაპრესინგებდა და სამწუხაროა რომ რაც არ უნდა ძლიერი მეტოქე იყოს, კარში რომ ვერ დაარტყამ თამაშის განმავლობაში, ეს ძალიან ცუდად ჩანს, რასაც გამართლება არ აქვს არანაირი.

ერთადერთი პოზიტივი ისაა, რომ გვაქვს წინ 5 თამაში და შეგვიძლია გამოვასწოროთ.

დღევანდელი მატჩი არავის ბრალი არ არის, ვერავის ვერ დავაბრალებ, ყველაფერში ჩვენს ხელშია და ჩვენივე გამოსასწორებელია ეს შედეგი." - აღნიშნა დადიანმა.