დანაკლისი ქართულ კალათბურთში - ზურაბ ტომარაძე გარდაიცვალა

საქართველოს საკალათბურთო ნაკრების ყოფილი მწვრთნელი, ზურაბ ტომარაძე ხანგრძლივი ავადმყოფობის შემდეგ, 62 წლის ასაკში გარდაიცვალა.

"საქართველოს კალათბურთის ეროვნული ფედერაცია ღრმა მწუხარებას გამოთქვამს საქართველოს დამსახურებული მწვრთნელის, ზურაბ ტომარაძის გადაცვალების გამო.

ზურაბ ტომარაძე გახლდათ საქართველოს ეროვნული ნაკრებისა და წამყვანი ქართული გუნდების მწვრთნელი. მისი ცხოვრება მთლიანად იყო დაკავშირებული კალათბურთთან და, მოპოვებულ ტიტულებთან და პრიზებთან ერთად, ზურაბ ტომარაძის დამსახურება დამოუკიდებელი საქართველოსთვის თაობების აღზრდაა", - წერს საქართველოს კალათბურთის ფედერაცია.

კოტე ტუღუშთან ერთად (2025 წელს, ქუთაისით, თსუ-ს წინააღმდეგ), ზურაბ ტომარაძე გამორჩეულია იმით, რომ სუპერ ლიგის ფინალი 0:2-დან აქვს მოგებული - 1998 წელს, ვითას მწვრთნელის რანგში, სერია აზოტს დაუტრიალა.

ტომარაძე საქართველოს ნაკრებს 1999-2001 წლებში წვრთნიდა. სხვადასხვა დროს ვითა-ს, ბასკო-სა და დინამო თბილისის მთავარი მწვრთნელი გახლდათ.