უკრაინისა და საქართველოს ნაკრებების დაპირისპირებამდე ანდრეი დემჩენკომ გუნდებზე ისაუბრა და საკუთარი პროგნოზი გააზიარა.
უკრაინელმა სპეციალისტმა აღნიშნა, რომ ორივე გუნდისთვის მიმდინარე ეტაპი რთულია და შედეგები იმედგამაცრუებელია, თუმცა წინ მძიმე ბრძოლა ელის:
ორივე მხარისთვის იმედგამაცრუებელი შედეგები გვაქვს. ჯვაროსნებმა მთავარი მწვრთნელი შეცვალეს. ვილი სანიოლის ნაცვლად რამაზ სვანაძე დაინიშნა. საქართველოს ნაკრები 5-მცველიანი ტაქტიკიდან 4-მცველიანზე გადავიდა და გაახალგაზრდავდა. ერთი მხრივ, ეს მათთვის კარგია, თუმცა შედეგები ორივე ნაკრებისთვის იმედგამაცრუებელია. ვერც უკრაინა ბრწყინავს და ნამდვილი ბრძოლა გველოდება.
დემჩენკომ ხვიჩა კვარაცხელიას ფაქტორზეც ისაუბრა და ხაზი გაუსვა, რომ მისი არყოფნა საქართველოს ნაკრებისთვის დიდი დანაკლისია, თუმცა გუნდს სხვა ძლიერი ფეხბურთელებიც ჰყავს:
ხვიჩა კვარაცხელია საქართველოს ნაკრებისთვის მნიშვნელოვანი ფიგურაა. შესაბამისად, მისი არყოფნა სერიოზული დანაკლისია. უკრაინისთვის ეს უპირატესობაა, თუმცა ვერ ვიტყვით, რომ საქართველოს ნაკრები კვარაცხელიას გარეშე არაფერს წარმოადგენს. მათ ძლიერი ფეხბურთელები ჰყავთ, რომლებიც ტოპ ჩემპიონატებში თამაშობენ. ხვიჩას გარეშეც შეუძლიათ იბრძოლონ და მიზანს მიაღწიონ.
რაც შეეხება მატჩის სცენარსა და პროგნოზს, დემჩენკომ ვარაუდი გამოთქვა, რომ შეხვედრა დაძაბული იქნება და გოლებიც გავა:
ვფიქრობ, მატჩი ფრედ დასრულდება. გოლების ნახვა მინდა და მგონია, რომ გავა კიდეც. ვვარაუდობ, რომ შეხვედრა 1:1 ან 2:2 მორჩება, თუმცა, როგორც პატრიოტი, ყოველთვის უკრაინის ნაკრებს დავუჭერ მხარს და ჩვენს ფეხბურთელებს გამარჯვებას ვუსურვებ.
ერთა ლიგის ჯგუფური ეტაპის დასკვნითი მატჩი უკრაინასა და საქართველოს შორის 17 ნოემბერს, თბილისის დროით 23:45 საათზე, სლოვაკეთის ქალაქ კოშიცეში გაიმართება.