საქართველოს ქალ მოჭადრაკეთა ნაკრებმა ესპანეთის ქალაქ ლინარესში მიმდინარე მსოფლიო ჩემპიონატზე გამოსვლა 1/4 ფინალურ ეტაპზე დაასრულა.
ჩვენი გუნდი, რომელიც ტურნირზე ნანა ძაგნიძის გარეშე (ჯანმრთელობის პრობლემა) თამაშობდა, აზერბაიჯანთან სუპერ დაძაბულ ბრძოლაში დამარცხდა - გუნდებს, გამარჯვებულის გამოსავლენად, ორი თამაშის ჩატარება დასჭირდათ.
პირველი შეხვედრა ფრედ, 2:2 დასრულდა, თანაბრად მიმდინარეობდა მეორე მატჩიც - ბელა ხოტენაშვილი და ნინო ბაციაშვილი თეთრებით ყაიმს დასჯერდნენ, მერი არაბიძემ კი ქულა შავებით აიღო, გადამწყვეტი ლელა ჯავახიშვილისა (შავებით) და გოვჰარ ბეიდულაიევას დაპირისპირება გამოდგა, რომელიც აზერბაიჯანელმა რთულ ბრძოლაში მოიგო და საკუთარ გუნდს 1/2 ფინალის საგზური გაუფორმა.
საქართველოს ნაკრები მსოფლიო ჩემპიონატის მოქმედი გამარჯვებულია და სტატუსს მიმდინარე გათამაშების დასრულების შემდეგ იმავე აზერბაიჯანს, ყაზახეთს, აშშ-ს ან ფიდეს გუნდს გადააბარებს - 1/2 ფინალში, ყაზახეთი აზერბაიჯანს ხვდება, ხოლო აშშ ფიდეს გუნდს.
