16 ივნისს Fox News-მა გაავრცელა ინფორმაცია, რომ FBI-მ წარმატებით აღკვეთა დაგეგმილი თავდასხმა UFC Freedom 250-ზე, რომელიც თეთრი სახლის ეზოში მიმდინარეობდა.
ვაშინგტონის ოფიციალური პირების ცნობით, ფედერალურმა ბიურომ საფრთხის შესახებ ინფორმაცია ღონისძიებამდე ოთხი დღით ადრე მიიღო.
გამოძიების შედეგად გამოვლინდა 23-კაციანი ქსელი (Signal-ის მომხმარებლები), რომლებიც თავდასხმას ამზადებდნენ. ამ დროისთვის დაკავებულია სულ მცირე ხუთი ეჭვმიტანილი. Fox News-ის ცნობით, ისინი ვირჯინიის შტატში, ფრედერიკსბურგში, საბოლოო მზადებას გადიოდნენ.
გეგმა მოიცავდა ასაფეთქებელი ნივთიერებებით დატვირთული დრონების გამოყენებას შენობების მიმართულებით. აფეთქებებს მასობრივი ევაკუაცია უნდა გამოეწვია, რათა ხალხის ნაკადი წინასწარ განლაგებული სნაიპერებისკენ მიემართათ. გეგმის ბოლო ეტაპზე დაგეგმილი იყო თეთრი სახლის ჭიშკარზე შეტევა.
ერთ-ერთმა ეჭვმიტანილმა გამომძიებლებს განუცხადა, რომ მათი მიზანი იყო კაპიტალისტი ელიტა, მილიარდერები და პოლიტიკოსები.
FBI-ის დირექტორმა, კაშ პატელმა, ოპერაცია წარმატებულად შეაფასა და განაცხადა:
FBI-ის, ჩვენი პარტნიორებისა და იუსტიციის დეპარტამენტის სწრაფი მოქმედებების წყალობით, მრავალი პირი დავაკავეთ და დაგეგმილი თავდასხმები სრულად აღვკვეთეთ.
აღსანიშნავია, რომ მიუხედავად ამ საფრთხისა, ღონისძიებაზე დამსწრე ფანებისთვის მხოლოდ მცირე დაგვიანება იყო შესამჩნევი. ჯო როგანმა UFC Freedom 250 „საბრძოლო სპორტის ისტორიაში ყველაზე დიდ ღამედ“ მონათლა.
