საქართველოს ნაკრების მთავარმა მწვრთნელმა, ვილი სანიოლმა სანაკრებო შეკრების წინ, ფეხბურთის ფედერაციის ვიცე-პრეზიდენტ ალექსანდრე იაშვილთან ერთად, ტრადიციული პრესკონფერენცია გამართა. ფრანგ სპეციალისტს ლაშა დვალის სანაკრებო სიაში არყოფნის მიზეზებზე ჰკითხეს.
"დვალი საბერძნეთთან საუკეთესო იყო, ძალიან კარგად ითამაშა ევროპის ჩემპიონატზეც, თუმცა მას შემდეგ მისი სამუშაო მოტივაცია იგივე აღარაა.
როდესაც ვუთხარი, რომ ესპანეთთან საშინლად ითამაშა და ვცადე, ეს ამეხსნა, მისი რეაქცია კარგი არ ყოფილა. განაცხადს მიღმა ამიტომ დავტოვე.
ლაშასთვის ნაკრების კარი ყოველთვის ღია იქნება, თუმცა ეს არის სიგნალი, მონახოს ძალა და მუშაობა ისეთივე მოტივაციით გააგრძელოს", - განმარტა სანიოლმა.
დვალმა ესპანეთთან ოქტომბრის მატჩში 90 წუთი ითამაშა, თურქეთთან კი სათადარიგოთა შორის იყო. იგი სექტემბრის შუა რიცხვებიდან მოყოლებული ცსკა სოფიას, სადაც 3 სექტემბერს ჩაირიცხა, ძირითადი შემადგენლობის სტაბილური წევრია.
2026 წლის მსოფლიო ჩემპიონატის საკვალიფიკაციო ეტაპის ეგიდით, საქართველოს ნაკრები 15 ნოემბერს ესპანეთს უმასპინძლებს, ხოლო 18 რიცხვში ბულგარეთში ითამაშებს.
