თოკომ ვარჯიში განაახლა - ითამაშებს თუ არა დღეს რეალთან კლასიკოში

თორნიკე შენგელიამ ბარსელონას გუშინდელი ვარჯიშის ნახევარი ჩაატარა და დღეს გადაწყდება, ითამაშებს თუ არა რეალ მადრიდთან გასამართ შეხვედრაში.

თოკოს მდგომარეობაზე მოკლე კომენტარი ბარსას მთავარმა მწვრთნელმა, ხოან პენიაროიამ გააკეთა: "შენგელიას გუნდთან ერთად ჯერ არ უვარჯიშია, მან ნახევარი ვარჯიში ჩაატარა და თავს ცოტათი უკეთესად გრძნობს".

კატალონიელთა მწვრთნელის თქმით, ქართველის კლასიკოში მონაწილეობის საკითხი უშუალოდ მატჩის დაწყებამდე გადაწყდება.

შეგახსენებთ, თოკომ მურსიასთან გასულ უქმეებზე გამართული შეხვედრა ტერფის დაჭიმულობის გამო დატოვა. ეს თამაშის დასრულებამდე 6.3 წამით ადრე მოხდა და იგი მატჩის საუკეთესო კალათბურთელი იყო - 21 ქულა, 3 მოხსნა და 1 ასისტი. ორივე გუნდში ყველაზე მაღალი შედეგიანობის ინდექსი ჰქონდა - 21.

ბარსელონა და რეალ მადრიდი, ევროლიგის მე-9 ტურის ეგიდით, დღეს, 23:30 საათიდან ბარსელონაში ითამაშებენ.